Дьулустаан Борисов: «Ил Дархан стратегическай соруктары туруорда»

СӨ бырабыыталыстыбатын бэрэссэдээтэлин солбуйааччы Дьулустаан Борисов Ил Дархан Анал этиитин туһунан санаатын үллэһиннэ.

— Быйылгы Анал этии түмүгү таһаарыы эрэ курдук буолбакка, стратегическай соруктары туруорар улахан этии буолла. Ил Дархан кэлэр сылларга өрөспүүбүлүкэ сайдыытын торумнаата. Буоларын курдук, Ил Дархан этиитигэр дьон олоҕун тупсарарга элбэх боппуруоһу таарыйда.

Бөдөҥ тэрилтэлэр сайдыылара, улахан инвестиционнай бырайыактары олоххо киллэрии — бу нолуоктан киирэр дохуот аҕыйаабатын мэктиэтэ. Биисинэс тыыннаах хааларын эрэ туһугар буолбакка, сайдарын, кэҥиирин курдук усулуобуйаны оҥоруохтаахпыт. Ол экэниэмикэ сайдыытын, нэһилиэнньэ олоҕун таһымын мэктиэтэ буолар.

Онон, күн бүгүн билиҥҥи кэм ыарахаттарын туорааһын эрэ буолбакка, инникитин экэниэмикэни сайыннарар өр кэмнээх стратегияны оҥоруу ирдэнэр. Бу стратегияны олоххо киллэрэргэ судаарыстыба уонна биисинэс бииргэ үлэлэһиитэ көмөлөһүөҕэ.