Дьулустаан Борисов Саха сиригэр инвестиционнай килиимэти тупсарыыга сорудахтары биэрдэ

СӨ Бырабыыталыстыбатын Бэрэссэдээтэлин бастакы солбуйааччыта Дьулустаан Борисов «РФ судаарыстыбаннай уонна муниципальнай хонтуруол туһунан» федеральнай сокуону олоххо киллэриигэ уонна эрэгийиэҥҥэ административнай кыһалҕалары аччатыыга аналлаах үлэлиир бөлөх мунньаҕын түмүгүнэн эрэгийиэҥҥэ инвестиционнай килиимэти тупсарыыга кэккэ сорудахтары биэрдэ.

Кэтээн көрөр уорганнар хонтуруоллуур тэрээһиннэри уонна сэрэтэр тэрээһиннэри ыытар кэмнэригэр «Инспектор» мобильнай сыһыарыытын уонна атын судаарыстыбаннай информационнай тиһиктэри киллэриэхтээхтэр. Ону сэргэ, инвестордарга ордук-хоһу ирдэбиллэри туоратар инниттэн, судаарыстыбаннай уонна муниципальнай хонтуруолу тупсарыыга саҥа миэрэлэри ылыныахтаахтар.

Дьулустаан Борисов бэлиэтээбитинэн, ПМЭФ-2025 түһүлгэтигэр Стратегическай инициативалар ааҕыныстыбата Арассыыйа эрэгийиэннэригэр инвестиционнай килиимэт туругун национальнай рейтинин түмүгүн билиһиннэрбит. Саха сирэ бу рейтингэ дойду бары эрэгийиэннэрин ортотугар 21-с миэстэни ылбыт.
Кини этэринэн, Национальнай рейтинг эрэгийиэннээҕи былаас уорганнарын биисинэһи ыытыыга тоҕоостоох усулуобуйаны тэрийэр кыахтарын сыаналыыр уонна бастыҥ уопуттары быһаарар, диэн Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата иһитиннэрэр.