Улуустартан уонна Дьокуускай куораттан барыта 24 хамаанда, 890 спортсмен, 95 тириэньэр, 200 бэрэстэбиитэл, арыаллааччылар «Дьулуур» адаптивнай успуорка күрэхтэһии түһүлгэтигэр түмсүөхтэрэ. Күрэхтэһии от ыйын 12-16 күннэригэр Амма улууһугар буолаары турар.
Спартакиада Ил Дархан Айсен Николаев дьаһалынан адаптивнай успуорду, доруобуйаларынан хаччахтаах дьоҥҥо чэбдигирдэр үлэни сайыннарар, чэгиэн, чөл олоҕу киэҥник тарҕатар сыаллаах-соруктаах ыытыллар.
Маннык көрүҥнэргэ күөн көрсөллөр: олорон эрэ волейболга, чэпчэки атлетикаҕа, дуобакка, остуол тенниһигэр; харахтарынан мөлтөхтөр голболга, чэпчэки атлетикаҕа; мөлтөхтүк истэр, дьүлэй дьон чэпчэки атлетикаҕа, буулдьанан ытыыга, остуол тенниһигэр, дуобакка.
Спартакиада үөрүүлээх быһыыга-майгыга арыллыыта уонна түмүгэ, чэпчэки атлетикаҕа күрэхтэһиилэр «Амга — Олимп» стадиоҥҥа ыытыллаллар. Олорон эрэ волейболлааһын уонна дуобат — Николай Захаров — Сахаачча аатынан элбэх хайысхалаах успуорт саалатыгар буолуоҕа. Остуол тенниһигэр «Доҕордоһуу» успуорт комплексыгар, буулдьанан ытыыга — Чапчылҕаҥҥа оскуола успуорт саалатыгар, голболга — Бөтүҥҥэ успуорт адаптивнай көрүҥнэригэр элбэх хайысхалаах успуорт саалатыгар илин-кэлин түсүһүөхтэрэ.
Түһүлгэҕэ бочуоттаах ыалдьыттарынан — РФ паралимпийскай кэмитиэтин вице-бэрэсидьиэнэ, паралимпийскай оонньуулар чөмпүйүөннэрэ Иван Потехин, РФ үтүөлээх тириэньэрэ, остуол тенниһигэр тириэньэр Дмитрий Сазонов, остуол тенниһигэр Арассыыйа сүүмэрдэммит хамаандатын ыстаарсай тириэньэрэ Максим Слаботчуков буолаллар.
Спартакиаданы арыйыы долгутуулаах сиэригэр-туомугар — паралимпиецтар уонна сурдлимпиецтар бэйэлэрин тус тириэньэрдэрин кытта кытталлар: Анастасия Диодорова, Степанида Артахинова, Алена Дмитриева, Владимир Балынец, Василий Стрекаловский уо.д.а.
Тэрээһин иитинэн ыалдьыттарга, маастардарга анаан паралимпийскай уруоктар — ох саанан ытыыга уонна остуол тенниһигэр ыытыллыахтара.
Дьокуускайга 2004 сыллаахха буолбут адаптивнай успуорт I спартакиадатыгар 120 киһи кыттыыны ылбыта.
СӨ Ил Дарханын уонна Бырабыыталыстыбатын пресс-сулууспата
Бүгүн, ахсынньы 17 күнүгэр, Дьокуускайга 1–5-с кылаас үөрэнээччилэригэр актированнай күн биллэрилиннэ. Бу туһунан киин куорат…
Ахсынньы 13-15 күннэригэр Москва куоракка «Твой Ход – 2025» Бүтүн Арассыыйатааҕы устудьуоннар пуорумнара ыытылларынан, «Сыл…
Дьокуускайга административнай дьиэҕэ тахсыбыт киһи өлүүлээх баһаар холуобунай дьыалатыгар бириигэбэри таһаардылар. Бу туһунан ахсынньы 16…
Бүгүн, ахсынньы 16 күнүгэр, Дьокуускайга Российскай Федерация бочуоттаах полярнигын Николай Находкин «Санников сиригэр эспэдииссийэ» диэн…
Өрөспүүбүлүкэ агробырамыысыланнай комплексын 2025 сыллааҕы үлэтин түмүктүүр мунньаҕар бастыҥ муниципальнай оройуоннар бэлиэтэннилэр. Бу туһунан СӨ…
Тымныыттан эчэйии үксэ арыгы иһииттэн тахсар диэн Өрөспүүбүлүкэтээҕи 2 №-дээх балыыһатын - Суһал мэдиссиинэ көмөтүн…