Дуобакка бастыыр иһин күрэхтэһии саҕаланна

 Уолаттар уонна кыргыттар дуобакка бастыыр иһин күрэхтэһиилэрэ саҕаланна. Күөн күрэс тохсунньу 16-21 күннэригэр ыытыллар.

Өрөспүүбүлүкэтээҕи дуобат-шахмат киинигэр, Анатолий Карпов аатынан шахмат оскуолатыгар уонна «Юность» стадиоҥҥа дуобатчыттар илин-кэлин түсүһэллэр. Бу РФ Бэрэсидьиэнэ Владимир Путин көҕүлээбит «Демография» национальнай бырайыак иитинэн, «Спорт — олох нуормата» федеральнай бырайыак өйөбүлүнэн ыытыллар.

—Быйылгы күрэхтэһиигэ өрөспүүбүлүкэ 14  улууһуттан уопсайа 112 уол уонна 147 кыыс түмүстэ. 20-гэр диэри саастаахтарга кыайыыны ситиспиттэр Саха сирин чиэһин Ярославль куоракка Арассыыйаҕа бастыыр иһин күрэхтэһиигэ көмүскүөхтэрэ. Онтон кыраларга кыайыыны ситиспиттэр Самараҕа бастыыр иһин күрэхтэһиигэ кыттыахтара«, — диэн сырдатта кылаабынай судьуйа Вячеслав Варламов.

Саастарынан маннык категорияларынан күрэхтэһэллэр:

9-гар диэри саастаахтар (2016-2018 т.с.),
11-гэр диэри саастаахтар (2014 с.т. улахана суохтар),
14-гэр диэри саастаахтар (2011 с.т. улахана суохтар),
17-гэр диэри саастаахтар (2008 с.т. улахана суохтар),
20-гэр диэри саастаахтар (2005 с.т. улахана суохтар).

#Владимир Путин

СӨ Ил Дархан уонна Бырабыыталыстыба пресс-сулууспата