Дворник үлэтэ ыарахан

Дьокуускай куоракка хас сарсыарда аайы эрдэ икки киһи хаар күрдьэ, дьиэ таһын ис ис сүрэхтэриттэн хомуйа, харбыы  сылдьалларын көрөбүн.  Бу олус ыарахан үлэлээх дьиэ таһын хомуйааччылар – дворниктар үлэлэрин туһунан ыйыталаһыах санаам кэлэр. Онон биирдэ тохтооммун кинилэр кимнээхтэрин туоһуластым.

Бастаан эдэрчи соҕус киһини кытта кэпсэттим, киһим саҥарбат барахсан эбит. Онон сурук нөнүө кэпсэттибит. Аатым Константин Сивцев диэтэ. Кэргэннээх, түөрт оҕолоох. Оҕолоро оскуолаҕа үөрэнэллэр эбит. Дворнигынан үлэлээбитэ сэттэ сыл буолбут.

— Бу үлэ наһаа чэпчэкитэ суох үлэ.Үлэбин биэс чаастан саҕалыыбын. Маны таһынан биир сиргэ эмиэ үлэлээхпин.  Хамнаһым ыраастыыр-көрөр сирбэр син эппиэттэһэр. Дьиэ кэргэммин иитэргэ туох да үлэттэн толлубаппын, —  диэн иһирэх баҕайытык ыйытыыбар хардаран суруйда.

Аны иккис киһибэр чугаһаатым  Мир Потапов диэн эбит. Урут дойдутугар хачыгаарынан, завхоһунан үлэлээбит. Билигин бу “СЭТО” тэрилтэ көрөр-хааччыйар биир тэрилтэтигэр дворнигынан  уон иккис сылын таһаарыылаахтык үлэлиир.

— Чэпчики үлэ диэн суох, үлэ барыта ыарахан. Хамнаһым социальнай пакеттаах, хойутаппакка төлүүллэр. Сибиэһэй салгыҥҥа үлэли ир буолан, үлэбин олус сөбүлүүбүн. Ыраастыыр учаастакпытын аҥаардаһан үлэлиибит,  арыт наһаа хаар түстэҕинэ, бэйэ-бэйэбитигэр көмөлөһөбүт. Маны таһынан күн аайы эбийиэкпит бөҕүн-сыыһын таһабыт, — диэн санаатын үллэһиннэ Мир Потапов.

Дьэ, бу курдук сарсыарда эрдэттэн үлэлэрин саҕалыыр, өрүү үлэлэригэр  бэриниилээх дьон баар буолан, олорор дьиэлэрбит, эбийиэктэр тастара ыраастар.

Дьокуускай куорат үрдүнэн төһөлөөх элбэх маннык үлэһиттэрдээх буоламмыт, куораппыт ыраас буоллаҕа. Онон Дьокуускай куорат дьаһалтата, тэрилтэлэр дворниктар  үлэлэрин сыаналыылларыгар баҕарабын.

 

 

Вера Владимирова, Дьокуускай

Хаартыска: В.Владимирова түһэриитэ.