Дьячковскайдар Арассыыйа Бочуотун кинигэтигэр киллэрилиннилэр

Ахсынньы 15 күнүгэр Саха Өрөспүүбүлүкэтигэр Ийэ сылын түмүктэрин таһаарыы чэрчитинэн,  «Сыл бастыҥ дьиэ кэргэнэ» куонкурус кыайыылаахтарын наҕараадалаатылар. Ону сэргэ Арассыыйаҕа бастыҥ ыал куонкуруһугар Саха сириттэн кыттан, «Дьиэ кэргэн-2022» Бүтүн Арассыыйатааҕы куонкуруска «Дьиэ кэргэн -– үгэстэри харыстааччы» номинацияҕа кыайбыт Светлана уонна Василий Дьячковскайдары эҕэрдэлээтилэр.

СӨ үлэҕэ миниистирэ Елена Волкова кинилэргэ  Бүтүн Арассыыйатааҕы куонкурус дипломун уонна 2022 сыл Бочуотунай кинигэтин туттарда. Миниистир  Дьячковскайдар дьиэ кэргэн сыаннастарыгар, үгүс көлүөнэни ситимнээһиҥҥэ, патриотизмҥа бэриниилээхтэрин бэлиэтээтэ.
«Бүгүн миэхэ Чурапчы улууһун олохтоохторо Светлана Георгиевна уонна Василий Николаевич Дьячковскайдарга «2022 сыл бастыҥ дьиэ кэргэнэ» Бүтүн Арассыыйатааҕы куонкурус тэрийэр кэмитиэтин аатыттан  наҕарааданы   туттарар үрдүк чиэс тигистэ. Кинилэр -– ааспыт сыллааҕы өрөспүүбүлүкэтээҕи куонкуруска кыайбыттара, аны быйыл федеральнай таһымҥа бочуоттаах ааты ылар иһин кииристилэр. Бу куонкуруска дойду бары муннугуттан 3 тыһыынчаттан тахса ыал кыттыбыта.
Дьячковскайдар былырыын олорбуттара 60 сылын, «бриллиант сыбаайбаларын» бэлиэтээбиттэрэ. Кинилэр 4 оҕону төрөтөн улаатыннарбыттара, 12 сиэннээхтэр уонна 14 хос сиэннээхтэр. Дьячковскайдар дьиэ кэргэттэригэр саха төрүт үгэстэрин тутуһаллар уонна дьиэ кэргэн сыаннастарын көлүөнэттэн көлүөнэҕэ биэрэллэр. Биһиги Саха сиригэр маннык кэрэхсэнэр ыал баарынан киэн туттабыт», – диэн туран,  Елена Александровна үтүөлээх наҕарааданы туттарда.

Дьячковскайдар дьиэ кэргэн үгүс үтүө үгэстээхтэр. Олортон биир сүрүннэринэн төрөөбүт күннэри, дьиэ кэргэн уонна үгэс буолбут уопсай бырааһынньыктары бары бииргэ ылаллара буолар. Бу дьиэ кэргэҥҥэ оҕолору, сиэннэри кыра эрдэхтэриттэн эппиэтинэстээх, үтүө санаалаах, бэйэ бэйэни өйөһөр-өйдөһөр, бэйэ дойдутугар бэриниилээх буоларга уонна дьиэ кэргэн үгэстэрин харыстыырга үөрэтэллэр.