Хаартыска: Василий Прокопьев
Бүгүн, муус устар 12 күнүгэр, эдэр сааһыгар олохтон туораабыт суруналыыс Татьяна Васильева аймахтара уонна доҕотторо пресс-кэмпириэнсийэ тэрийэн ыыттылар.
Санаттахха, 2021 сыл балаҕан ыйын 15 күнүгэр икки игирэ кырачаан кыыс ийэтэ, СИА суруналыыһа Татьяна Васильева (Симакова) 41 сааһыгар Дьокуускайга Семен Данилов уонна Жорницкай аатынан уулуссалар быһа охсуһууларыгар суол саахалыгар соһуччу олоҕо быстыбыта.
Пресс-кэмпириэнсийэҕэ иһитиннэрбиттэринэн, Татьяна Васильеваны түҥнэри көппүт суоппар ханнык да эппиэтинэһи сүкпэтэх. Силиэстийэлиир уорганнар киһи өлүүтүгэр буруй састаабын булбатахтар, ону тэҥэ холуобунай дьыала көбүтүллүбүтэ иккис төгүлүн тохтотуллубут. Тэрээһиҥҥэ бииргэ төрөөбүт балта Анна, убайа Ян уонна албакаат Павел Васильев кытыннылар.
Албакаат Павел Васильев суруналыыстарга хоруйдаан, силиэстийэни младшай лейтенант, балайда уопута суох, дьыалаҕа сиһилии сыстыбатаҕын эттэ. Тахсыбыт суол быһылааныгар туоһу суох, онон дьыаланы силиэстийэлээччилэр хас да төгүл уларыйбыттара этилиннэ. Аймахтара уонна албакаат холуобунай дьыала матырыйаалларын кытары билиҥҥэ диэри билсэр кыахтара суох эбит. Арай сэрэппэккэ эрэ, бу сыл олунньутугар, холуобунай дьыаланы тохтотор туһунан уурааҕы иккиһин туттарбыттар. Бу иннинэ холуобунай дьыала 2022 сыл ахсынньытыгар тохтотулла сылдьыбыта биллэр. Татьяна аймахтара уонна албакаат дьыаланы көбүтэн, өссө күүскэ кичэллээхтик силиэстийэни ыыталларыгар уонна чинчийэллэригэр эрэйэллэр.
Саха сиринээҕи ИДьМ силиэстийэлиир управлениета суол быһылаана тахсыбыт дьыаланы үс сыл устата силиэстийэлээбит. Ол курдук, пресс-кэмпириэнсийэҕэ үгүс суруналыыстар холуобунай дьыаланы силиэстийэлээһин хас да сыл устата соһуллан чинчийиллибитигэр мунаахсыйалларын биллэрдилэр. Сорох кэмҥэ бу дьыаланы анаан-минээн уһаппыттарыгар сабаҕалааһыннар кытта бааллара этилиннилэр.
Татьяна Васильева доҕотторо уонна аймахтара кырдьыгы ситиһэр сыалтан, үрдүкү салалтаҕа тиийэ тахсар санаалаахтар. Онон бу пресс-кэмпириэнсийэ дьыаланы тиһэҕэр тиэрдэргэ, буруйдааҕы буларга, уурааҕы көтүрэргэ, дьулаан быһылааны өссө сыныйан үөрэтэллэригэр уонна көбүтэргэ бастакы хардыынан буолуоҕа.
Бэлиэтээн эттэххэ, Татьяна икки игирэ кыыһа тулайаах хаалбыттара. Кинилэри бииргэ төрөөбүт балта Анна эпиэкэҕэ иитэ ылбыта, бэйэтэ икки оҕолоох. Билигин кыргыттар 15 саастаахтар, 8 кылааска үөрэнэллэр.
Сиһилии бу иннинэ Эдэр саас саайка «Силиэстийэ тоҕо уһаата?» диэн суруналыыс Сардаана Кузьмина матырыйаалын ааҕыҥ.
ХОЙ Туохха барытыгар санааны уурдахха ситиһии кэлэрин өйдөөҥҥүн, туттумахтаан хаалыаххын наада. Үлэҕинэн үрдүүргэр табыгастаах кэмнэр. Тус…
Бүгүн, ыам ыйын 16 күнүгэр, саха литературатын устуоруйатыгар киирэр дьоһуннаах тэрээһин П.Ойуунускай аатынан Литература түмэлигэр…
Ыам ыйын 19 күнүгэр Дьокуускай куорат олохтоохторо «ЗаБег.РФ» Бүтүн Арассыыйааҕы полумарафоҥҥа кыттыахтарын сөп. Тэрээһин күнүс…
ИДьМ 2 №-дээх полициятын оперативниктара киин куоракка рестораны уоттуу сатаабыт 33 саастаах дьахтар буоларын быһаардылар.…
СӨ Дьарыктаах буолууга судаарыстыбаннай кэмитиэтэ анал байыаннай дьайыы кыттыылаахтарыгар уонна кинилэр дьиэ кэргэттэригэр анаан Кэлим…
РФ Бэрэсидьиэнэ Владимир Путин КНӨ бэрэссэдээтэлэ Си Цзиньпин ыҥырыытынан Кытай Норуодунай Өрөспүүбүлүкэҕэ икки күннээх судаарыстыбаннай…