Дьүөгэтин быһаҕынан анньыбыт

Киин куоракка күннэтэ кэриэтэ араас быһылааннар  тахса тураллар. Бу күннэргэ арыгы содулуттан эдэр дьахтар эчэйиилээх быһылаан таҕыста.  

Дьокуускай куоракка полиция 2-с нүөмэрдээх  отделын дьуһуурунай чааһыгар биир кыыс быһаҕынан анньыллан балыыһаҕа  киирбитин туһунан  иһитиннэрбиттэр.
Холуобунай ирдэбил оперативниктара быһаарбыттарынан, кыыһы 23 саастаах  дьүөгэтэ эчэппит эбит.
Ол курдук, быһылаан тахсар күнүгэр, эмсэҕэлээччи буруйданааччы дьиэтигэр ыалдьыттыы сылдьан, иккиэн арыгылаабыттар. Ол сылдьан айдаарсан турбуттар. Онуоха эмсэҕэлээччи дьүөгэтин хаста даҕаны сирэйигэр сырбаппыт. Инньэ гынан биирэ остуолга сытар быһаҕы сулбу тардан ылан, дьүөгэтин иһигэр анньыбыт. Ол кэннэ эмсэҕэлээччини балыыһаҕа илдьибиттэр.

Билигин 23 саастаах кыыска РФ Холуобунай кодексын 111 ыст. 2 ч. холуобунай дьыала көбүтүллүбүт.