ДЫГЫН ООННЬУУЛАРА: сэрэбиэй ыытылынна, ким кими кытта киирсэрий?

Өрөспүүбүлүкэтээҕи «Сахамедиа» медиа-кииҥҥэ «Дыгын оонньууларын» сэрэбиэйин ыыттылар

Ааттаах-суоллаах турнир бары 16 кыттааччыта успуорт көрүҥнэринэн сэрэбиэй тартылар, ону таһынан кинилэргэ быйылгы күрэхтэһии саҥа уларыйыыларын туһунан кэпсээтилэр, диэн ЯСИА иһитиннэрэр.

Урут «Дыгын оонньууларыгар» 12 спортсмен кыттар эбит буоллаҕына, быйыл кинилэр ахсааннара 16-ҕа диэри улаатта. Бу турнирга сүрүн саҥаны киллэриинэн буолуоҕа уонна бастыҥ многоборецтар киирсиилэрин хаамыытыгар хас да уларытыы киирэр.

Ол курдук, хапсаҕайга уонна мас-рестлиҥҥэ систиэмэ уларыйыаҕа — кыттааччылар иккитэ хоттордохторуна туорууллар, ол аата «А» уонна «Б» бөлөхтөр диэн аны суох буолуохтара.

Ону таһынан, тутум эргииргэ уонна оҕунан ытыыга былаһааккаҕа биир кэмҥэ түөртүү спортсмен тахсыаҕа. Оттон сүүрүүгэ бары 16 многоборец тэҥҥэ сүүрүөҕэ, онон бу көрүҥҥэ күөнтэһиини өссө элбэтиэҕэ.

Сэрэбиэй сорохторго табыллыылаах, оттон атыттарга – төттөрүтүн буолла. Үс төгүл үс ыстаныыга секторга саамай бастакынан Артём Дьяконов, кини кэнниттэн Борис Сдвижков уонна Алексей Уваровскай тахсыахтара.

Бу көрүҥҥэ бастыҥ спортсменынан ааҕыллар Дьокуускай куораттан Яков Дмитриев уочаратынан 13-нэн ыстаныаҕа. Кини кэнниттэн Тимофей Большаков, Валентин Афанасьев, оттон бүтэһигинэн Алексей Соколов киириэҕэ. Тутум эргииргэ бүтэһигинэн түөрт буолан Алексей Ефимов, Владимир Шологонов, Алексей Соколов уонна Айсен Ботуев киирсиэхтэрэ. Онон кинилэр утарылаһааччыларын түмүктэрин билэр буоланнар, ситэргэ холонуохтара.

Мас-рестлиҥҥэ бу көрүҥҥэ бастыҥынан ааҕыллар Николай Матаннановка бастакы эргииргэ Алексей Уваровскай түбэстэ. Тимофей Большаков Айсен Ботуевы утары киирсиитэ интэриэһи тардар. Владимир Шологонов оонньуу саҥа кыттааччыта Алексей Ефимовы кытта күүһүн холонуоҕа.

Борис Сдвижков бастакы эргииргэ Борис Строевы кытта киирсиэҕэ.

Салгыы хотугу многоборьеҕа Арассыыйа чөмпүйүөнэ Алексей Созонов уонна «Бэргэн оонньууларын» кыайыылааҕа Иван Степанов бэйэ-бэйэлэрин кытта утары тахсыахтара.

Алексей Соколов бастакы эргииргэ Александр Пшенниковы кытта көрсүөҕэ. Яков Дмитриев утарылаһааччытынан эдэр дебютант Валентин Афанасьев буолуоҕа.

Оттон 2023 сыллааҕы «Дыгын оонньууларын» кыайыылааҕа Вячеслав Дьяконов турниры биир араспаанньалаах Артем Дьяконовы кытта саҕалыаҕа.

Сэрэбиэй «Дыгын оонньууларын» иккис күнүгэр буолар хапсаҕайга эмиэ улахан оруолу оонньуоҕа. Бу көрүҥҥэ быйылгы сезон сүүмэрдиир түһүмэхтэригэр хас да бастыҥ спортсмен баара – Вячеслав Дьяконов, Алексей Ефимов, Артём Дьяконов. Бу көрүҥҥэ кыайбыт спортсмен бэйэтигэр суолталаах очколары ылыаҕа, ону таһынан таас көтөҕүүгэ бүтэһигинэн барар быраабы ылыаҕа.

Вячеслав Дьяконов бастакы эргииргэ Владимир Шологоновы кытта эмиэ күөн көрсүөҕэ. Иккиэн Бороҕоҥҥо буолбут Чөмпүйүөн Куубагар тустубуттара. Айсен Ботуев утарылаһааччытынан Алексей Созонов буолуоҕа.

Сэрэбиэй эмиэ Кэбээйи улууһун икки бэрэстэбиитэлин Алексей Уваровскайы уонна Артём Дьяконовы бастакы эргииргэ икки ардыларыгар түбэһиннэрдэ. Оттон Алексей Ефимовка Борис Строев утарылаһыаҕа.

Бүтэһик пааранан Яков Дмитриев уонна Иван Степанов тахсыахтара.

«Дыгын оонньууларын» бастакы күнэ бэс ыйын 28 күнүгэр 15 чаастан Үс Хатыҥ сүрүн аренатыгар саҕаланар. Кыттааччылар ортолоругар үс төгүл үс ыстаныыга, тутум эргииргэ уонна мас-рестлиҥҥэ бастыҥнары быһаарыахтара. Оттон иккис күн, бэс ыйын 29 күнүгэр, күрэхтэһии эмиэ онно 12 чаастан буолуоҕа. Боотурдар оҕунан ытыыга, сүүрүүгэ, хапсаҕайга уонна таас көтөҕүүгэ киирсиэхтэрэ.

Оонньуу кыайыылааҕа «Прогресс» ХЭТ-тэн үс мөлүйүөн солкуобайы уонна Дьокуускай куорат дьаһалтатыттан «УАЗ-Патриот» массыынаны тутуоҕа.