«Дыгын оонньууларын» бастакы сүүмэрдээһинигэр күрэсчиттэр сайаапка биэрдилэр

Сэтинньи 29-30 күннэригэр «Дохсун» успуорт уораҕайыгар ыытыллар «Дыгын оонньууларын» бастакы сүүмэрдиир күрэҕэр успуорт көрүҥнэригэр чаҕылхай сулустар сайаапка биэрдилэр. Бу туһунан мандаат хамыыһыйатын түмүгүнэн билиннэ, диэн ЯСИА иһитиннэрэр.

Мандаат хамыыһыйатын элбэх ааттаах-суоллаах күрэсчит ааста. Кинилэр ортолоругар «Манчаары оонньууларын» кыайыылаахтара, «Дыгын оонньууларын» призердара, мас-рестлиҥҥэ аан дойду чөмпүйүөннэрэ, бодибилдиҥҥэ Саха сирин чөмпүйүөнэ, хотугу многоборьеҕа успуорт маастардара уонна да атыттар бааллар.

Күрэхтэһии сэтинньи 29 күнүгэр сарсыарда 9 чаастан саҕаланар. Күрэсчиттэр үс төгүл үс, тутум эргиир уонна мас тардыһыытыгар күөн көрсүөхтэрэ. Оттон сэтинньи 30 күнүгэр оҕунан ытыы, сүүрүү, хапсаҕай уонна таас көтөҕүү буолуоҕа.

Бу күрэхтэһиигэ Антон Тойтонов, Айхал Бюлтясов, Айсен Семенов, аан дойду чөмпүйүөннэрэ Василий Захаров, Семен Ануфриев, бодибилдиҥҥэ Саха сирин чөмпүйүөнэ Артур Васильев, мас-рестлиҥҥэ норуоттар икки ардыларынааҕы турнир кыайыылааҕа Ариан Мярин аан бастаан кытталларынан уратылаах буолуоҕа. Николай Матаннанов онус төгүлүн «Дыгын оонньууларыгар» сүүмэрдэнэргэ холонуоҕа. Мандааты уопсайа 60-ча многоборец ааста.

Бастакы сүүмэрдиир түһүмэххэ  үс эрэ бастыҥ күрэсчит «Дыгын оонньууларыгар» путевканы ылыаҕа. Ону тэҥэ бары кыттааччылар рейтинг очукуоларын хомуйуохтара.

Санатан эттэххэ, үс сүүмэрдээһин түмүгүнэн рейтинг быһыытынан алта бастыҥ кыттааччы ааһыаҕа.

Бастакы сүүмэрдиир күрэх сулустаах састааба:

• Николай Матаннанов (Таатта улууһа) – саха многоборьетыгар «Манчаары оонньууларын» кыайыылааҕа.
• Тимофей Большаков (Сунтаар улууһа) – саха многоборьетыгар «Манчаары оонньууларын» кыайыылааҕа.
• Артем Дьяконов (Кэбээйи улууһа) – саха многоборьетыгар Саха сирин юниордарга бастыыр иһин күрэҕин кыайыылааҕа.
• Василий Захаров (Амма улууһа) – мас-рестлиҥҥэ икки төгүллээх аан дойду чөмпүйүөнэ.
• Семен Ануфриев (Дьокуускай к.) – мас-рестлиҥҥэ аан дойду чөмпүйүөнэ.
• Дмитрий Ноев (Чурапчы улууһа) – «Тоҕус томтор» оонньууларын көрүҥнэригэр призер.
• Айхал Бюлтясов (Үөһээ Бүлүү улууһа) – чэпчэки атлетикаҕа Саха сирин чөмпүйүөнэ.
• Владислав Попов (Нам улууһа) – сахалыы ыстаныыларга успуорт маастара.
• Антон Тойтонов (Нам улууһа) – «Дыгын оонньууларын» хас да төгүллээх кыттыылааҕа.
• Иван Степанов (Дьокуускай к.) – «Бөҕөстөр оонньууларын» кыайыылааҕа.
• Ариан Мярин (Томпо улууһа) – Аммаҕа ыытыллыбыт мас-рестлиҥҥэ норуоттар икки ардыларынааҕы турнир кыайыылааҕа.
• Артур Васильев (Дьокуускай к.) – бодибилдиҥҥэ Саха Гран-притын кыайыылааҕа.
• Алексей Созонов (Орто Халыма улууһа) – хотугу многоборьеҕа Саха сирин абсолютнай чөмпүйүөнэ.
• Алексей Соколов (Сунтаар улууһа) – «Дыгын оонньууларын» призера.
• Петр Прудецкай (Үөһээ Дьааҥы улууһа) – саха многоборьетыгар Саха сирин чөмпүйүөнэ.
• Айсен Семенов (Өлөөн улууһа) – мас-рестлиҥҥэ Арассыыйа чөмпүйэнээтин хас да төгүллээх призера.
• Владимир Шологонов (Үөһээ Бүлүү улууһа) – «Дыгын оонньууларын» хас да төгүллээх кыттыылааҕа.
• Иван Шологонов (Үөһээ Бүлүү улууһа) – мас-рестлиҥҥэ Арассыыйа чөмпүйэнээтин призера.
• Михаил Руфов (Үөһээ Бүлүү улууһа) – чэпчэки атлетикаҕа  «Манчаары оонньууларын» кыайыылааҕа.
• Алексей Ефимов (Муома улууһа) – «Дыгын оонньууларын» кыттыылааҕа.
• Айаал Бурцев (Горнай улууһа) – уолаттарга саха многоборьетыгар «Манчаары оонньууларын» кыайыылааҕа.
• Александр Пшенников (Өлүөхүмэ улууһа) – мас-рестлиҥҥэ Арассыыйа чөмпүйэнээтин призера.
• Арсен Федоров (Мэҥэ Хаҥалас улууһа) – Алексей Никифоров кэриэһигэр аналлаах саха успуордун көрүҥнэригэр турнир кыайыылааҕа.
• Яков Дмитриев (Кэбээйи улууһа) – «Дыгын оонньууларын» призера.
• Павел Друзьянов (Чурапчы улууһа) – «Тоҕус томтор» оонньууларын кыайыылааҕа.