«Дыгын оонньууларын» өссө үс кыттааччытын быһаарыахтара

Уус-Алдан улууһугар олунньу 7 -8 күннэригэр «Дыгын оонньууларын» сэттэ төгүллээх кыайыылааҕа Иван Белолюбскай чиэһигэр «Чөмпүйүөн Куубага» саха многоборьетыгар XI өрөспүүбүлүкэтээҕи турнир ыытыллар.

Бороҕоҥҥо ыытыллар «Чөмпүйүөн Куубага» Туймаада ыһыаҕын сүрүн спортивнай тэрээһинэ – «Дыгын оонньууларын» финалга иккис сүүмэрдиир түһүмэҕинэн буолуоҕа.

Күрэхтэһии өрөспүүбүлүкэ бастыҥ атлеттарын түмтэ, кинилэр ортолоругар үс путевка хаһаайына быһаарыллыаҕа. Турнирга 2019 уонна 2024 сыллардааҕы Куубак кыайыылааҕа Дьулустаан Ноговицын кыттар. Чөмпүйүөн Куубагын кыайыылааҕа бириис быһыытынан 300 тыһыынча солкуобайы ылыаҕа. Иккис миэстэ иһин 150 тыһыынча көрүллүбүт. Боруонса призерга убаһа туттарыллыаҕа. Итинтэн ураты, туспа көрүҥнэргэ бастыҥнары бэлиэтиэхтэрэ.

Чөмпүйүөн Куубага уон биирис төгүлүн ыытыллар. 2012 сыллаахха аан бастаан тэриллибитэ. Турнир кыайыылаахтарынан үстэ Хаҥалас улууһуттан Егор Филиппов уонна Намтан Вячеслав Дьяконов, иккитэ Горнай улууһуттан Дьулустаан Ноговицын буолбуттара. Ону таһынан, Намтан Алексей Кутуков уонна Уус-Алдантан Дмитрий Попов бастыҥнарынан буолбуттара.

Тэрээһин Арассыыйа Бэрэсидьиэнэ Владимир Путин көҕүлээбит «Арассыыйа успуорда» федеральнай судаарыстыбаннай бырагырааматын сыалларын уонна соруктарын толорууга туһуланар.

Чөмпүйүөн Куубага Бороҕон сэлиэнньэтигэр 2023 сыллаахха «Демография»  национальнай бырайыагынан тутуллубут Н.Н. Тарскай аатынан успуорт дыбарыаһыгар ыытыллар.

Сунтаар улууһуттан многоборец Алексей Соколов сахалыы ыстаныылар уонна тутум эргиир кэнниттэн Чөмпүйүөн Куубагын турнирнай табылыыссатын баһылаата. Кини кэнниттэн бастыҥнар ахсааннарыгар Кэбээйи улууһуттан Алексей Уваровскай уонна Сунтаар улууһуттан Тимофей Большаков иһэллэр.

Бастакы күн сарсыардааҥы бырагырааматыгар ыстаныыларга уонна тутум эргииргэ күрэхтэстилэр. Эбии көрдөрүүлэринэн, тоҕус очукуолаах, ааспыт сыллааҕы Дыгын оонньууларын призера Алексей Соколов инники күөҥҥэ таҕыста.

Оонньуулар чөмпүйүөннэрэ Кэбээйи улууһуттан Алексей Уваровскай эмиэ оччо очукуолаах. Манчаары оонньууларын кыайыылааҕа Тимофей Большаков – үһүс миэстэҕэ.

Кинилэр кэннилэриттэн Ньурбаттан Валентин Афанасьев, Мэҥэ-Хаҥаластан Даниил Слепцов, Орто Халыматтан Алексей Созонов, Чурапчыттан Айтал Бюлтясов уонна Павел Друзьянов кэккэлэстилэр. Дыгын оонньууларын чөмпүйүөнэ Горнай улууһуттан Дьулустаан Ноговицын билиҥҥитэ 32-с миэстэҕэ. Ол эрээри иннигэр кини сөбүлүүр көрүҥэ – мас-рестлинг күүтэр.