«Дыгын оонньууларын» кыайыылааҕа 3 мөл. солк. наҕараадаланыаҕа

2025 сылга 30-ус төгүлүн ыытыллар «Дыгын оонньууларын» сүрүн бирииһинэн 3 мөлүйүөн солкуобай буолуоҕа диэн «Спорт Якутии» таһаарыы иһитиннэрэр.

Туймаада ыһыаҕын биир бастыҥ түһүлгэтигэр «Прогресс» хампаанньа генеральнай дириэктэрэ Алексей Пинигин алтыс төгүлүн спонсор буоларын бигэргэттэ.

Эрдэ кыайыылаах эр бэрдэ 1 мөлүйүөн солкуобай харчынан наҕараадаланар этэ. Кэлэр сырыыттан сүрүн бириис үрдээн, кыттыбыт уолаттар эмиэ дьоһуннаахтык бэлиэтэниэхтэрэ.

Кэлэр оонньуулар финалыгар 16 боотур киирсиэҕэ. Спортсменнар ыһыахха ыытыллар сүрүн түһүлгэ иннинэ үс төгүллээн сүүмэрдиир түһүмэҕи ааһыахтара. Ол аата, хас биирдии спортсмен үс түһүмэххэ барытыгар кыттан, бааллары хомуйуоҕа. Үс түһүмэх түмүгүнэн бастыҥ көрдөрүүлээх уолаттар эрэ финалга ааһыахтара.

Бу рейтиннээх дэнэр түһүмэхтэр хаһан уонна ханна ыытыллаллара сотору биллиэҕэ диэн «Спорт Якутии» иһитиннэрдэ.