«Дыгын оонньууларын-2025» кыайыылааҕа — Борис Сдвижков!

Быйылгы Туймаада ыһыаҕын «Дыгын оонньууларын» кыайыылааҕынан Амма Чапчылҕанын уола Борис Сдвижков буолла!

«Аммалар быйыл хаһааҥҥытааҕар да сомоҕолоһуулаахпыт, түмсүүлээхпит. Бүгүн Амма киин тыйаатырыгар «Дыгын оонньууларын» быһа эпииринэн көрө олороллор. Дойдум дьонугар истиҥник махтанабын!»—  диэн кыайыытын төрөөбүт Амматын дьонугар анаата «Дыгын оонньууларын-2025» дьоруойа! Кыайыылаах Амматын былааҕын илиититтэн олох араарбат. Уонна… кыайыы сырдык дьаралыгар куустарбыт ааттыын да «Мичээр Боотур» сылаас мичээрин дьонугар-сэргэтигэр бэлэхтээтэ.

Мэктиэтигэр бүгүн тымныынан тыалыра турбут халлаан кытары үөрдэ — халыҥ былытын сыҕарытан, чаҕылхай күнү бэлэхтээтэ! Борис Сдвижков — саха норуотун киэн туттуута! Уруй-Айхал!