«Дыгын оонньууларын» кыайыылааҕа Борис Сдвижков бирииһин харчытынан Хатаска дьиэ туттар буолла

Бүгүн Хатас сэлиэнньэтин “Тускул” култууратын дьиэтигэр киһи баппат үлүгэрэ. Хатас олохтоохторо уонна Дьокуускайтан сылдьар ыалдьыттар «Дыгын оонньууларын» кыайыылааҕа Борис Сдвижковы эҕэрдэлии кэлбиттэр.

Ыалдьыттар быыстарыгар куорат баһылыга Евгений Григорьев уонна олимпийскай чөмпүйүөн Павел Пинигин бааллар.

Үөрүүлээх быһыыга-майгыга Борис Сдвижковка 3 мөлүйүөн солкуобайы уу харчынан турнир генеральнай спонсора Алексей Пинигин  туттарда.

Мичээр Боотур диэн ааттаммыт «Дыгын оонньууларын» кыайыылааҕа бу бирииһин Хатас сэлиэнньэтигэр кэтэх дьиэни туттарбар туһаныам диэтэ. Ону таһынан бу кыайыы киниэхэ улахан эппиэтинэһи сүктэрбитин бэлиэтээтэ диэн  “Спорт Якутии” иһитиннэрэр.