Дыгын оонньууларын кыайыылааҕар Вячеслав Дьяконовка мөлүйүөн туттардылар
![](https://sakha-sire.ru/wp-content/uploads/2023/06/whatsapp-image-2023-06-28-at-12.17.46-pm-960x640-1-e1687927882110-900x596.jpeg)
Бүгүн, бэс ыйын 28 күнүгэр, Дыгын оонньууларын кыайыылааҕар Вячеслав Дьяконовка 1 мөлүйүөн солкуобай биэрдилэр. Сүрүн бирииһи чөмпүйүөҥҥэ «Прогресс” тэрилтэ дириэктэрэ Алексей Пинигин туттарда. Бу туһунан СИА суруйар.
Спонсор көҕүлээһининэн, өрөгөйдөөх чиэстээһин Хатас сэлиэнньэтин култуура дьиэтигэр буолан ааста. Алексей Пинигин Дыгын оонньуулара салгыы да ыччакка холобур буола, күрэхтэһии таһыма үрдүү туралларыгар баҕарда.
Үөрүүлээх быһыыга – майгыга Дыгын оонньууларын урукку сылларын кыайыылаахтара Иннокентий Макаров, Николай Дьяконов, Иван Белолюбскай уонна Олимпийскай чөмпүйүөн Павел Пинигин кыттыыны ыллылар.
“Алта оонньуу тухары Николай Дьяконов өрөспүүбүлүкэ биир күүстээх спортсмена буоларын бигэргэппитэ. Ону кытта уола Вячеслав кыайыытынан бэйэтин эрэ аатын буолбакка, аҕатын эмиэ амарах аҕа, тириэнньэр уонна настаабынньык быһыытынан ааттатта. Вячеслав баара-суоҕа 22 саастаах. Кини иннитигэр – өссө элбэх күрэхтэр, кыайыылар. Саха омуга Дыгын оонньууларын Олимпиадаҕа холуубут. Ол тэтими тохтоппокко, ыччаты угуйан иһиэххэ», — диэн бэлиэтээтэ Павел Пинигин.
Санатан эттэххэ, Вячеслав Дьяконов аны кэлэр күрэхтэргэ, Үс Хатыҥ мааны түһүлгэтигэр кыттыбатын биллэрбитэ. Инники сыала — мас тардыһыыга ситиһиилэнии.
Эльдар Садовников.
Сообщить об опечатке
Текст, который будет отправлен нашим редакторам: