«Дыгын оонньууларын» сүрүн судьуйатынан Леонид Филиппов ананна

Саха сиригэр саамай күүтүүлээх многоборьеҕа күрэх кылаабынай судьуйатынан 2020 сыллааҕы «Дыгын оонньууларын» кыайыылааҕа, байыаннай дьайыы бэтэрээнэ Леонид Филиппов ананна.

Бу туһунан СӨ Физическэй култуураҕа уонна успуорка министиэристибэтэ иһитиннэрдэ. Филиппов этэринэн, кылаабынай судьуйа буолар этиигэ тута сөбүлэспит.

«Урукку чөмпүйүөннэр ортолоругар күрэҕи бэйэтинэн ааспыт киһи эрэ судьуйалыахтаах диэн санаа баара», — диэн кини бэлиэтээтэ. Саҥа быраабылалар эмиэ бааллар. Национальнай многоборье Федерациятын толорооччу дириэктэрэ Иван Белолюбскай этэринэн, быйыл успуорка сыһыана суох быһыы-майгы иһин саарбахтаабакка эрэ араҕас уонна кыһыл карточкалары биэриэхтэрэ. Ох саанан ытыыга эмиэ саҥа уларыйыы киирдэ — платформаҕа иккилии сыал турар, оттон охтубуту күрэсчит бэйэтэ талар.

«Дыгын оонньууларын» бастакы сүүмэрдиир түһүмэҕэ Дьокуускайга сэтинньи 29-30 күннэригэр  «Дохсун» успуорт уораҕайыгар ыытыллар. Саха сирин Успуорка министиэристибэтэ бэлиэтииринэн, аныгыс күрэхтэһиилэр уруккутунааҕар өссө тыҥааһыннаах буолуохтара. Күрэхтэһии аан бастаан саҥардыллыбыт систиэмэнэн ыытыллар — финалга бастыҥ үс эрэ күрэсчит тахсыаҕа. Олунньуга кыттааччылары иккис түһүмэх күүтэр — Уус Алдан улууһугар «Дыгын оонньууларын» сэттэ төгүллээх кыайыылааҕа Иван Белолюбскай аатыгар «Чөмпүйүөн Куубага» буолуо. Оттон быһаарыылаах түмүк муус устарга Чурапчыга үс төгүллээх чөмпүйүөн Иннокентий Макаровка аналлаах күрэхтэһиигэ биллиэҕэ.