Дыгын Попов: “Дьокуускайга снайпиҥҥа аһаҕас турнир ыытыллара олус бэрт”

Снайпердар күрэхтэһиилэригэр бойобуой сырыылары ааспыт, идэтийбит байыаннай дьону кытта любитель ытааччылар эмиэ кытталлар.

Дыгын Попов, 2 №-дээх өрөспүүбүлүкэтээҕи балыыһаҕа лучевой диагностикаҕа киинин салайааччыта:

-Снайпинынан 2019 сылтан дьарыктанабын. Хаста да Арассыыйатааҕы күрэхтэһиилэргэ кыттыбытым, оттон манна үһүс төгүлүн кыттабын. Бастакы сылбытыгар квалификацияны ааспыппыт, онно калибрым кыра этэ. Былырыын “Сулус” полигон аатыттан Саха сирин сүүмэрдэммит хамаандатыгар киирэн кыттыбытым. Онно төрдүс миэстэ буолбуппут. Быйыл балачча күүстээх калибрдары ыллыбыт. Хамаандабытыгар Арассыыйа чөмпүйэнээтигэр хаста да кыайбыт дьон бааллар, онон любитель таһымыттан тахсыбыттара ырааппыт дьон буолаллар.

Дьокуускайга снайпиҥҥа аһаҕас турнир ыытыллара олус бэрт. Арассыыйа Федерациятын Сэбилэниилээх Күүстэрэ барыта кыттыылаах маннык таһымнаах күрэхтэһии биһиги дойдубутугар суох, онон бэйэтин кэмигэр маннык полигон тутуллубутугар Юрий Петровичка махтаныахха наада.

Александр, Дьокуускай олохтооҕо, гражданскай стрелок:

-Бу үһүс сырыым, бастакы сырыыбын ордук өйдөөн хаалбыппын. Бэлиэтээн көрдөххө, хас сырыы аайы кыттааччы ахсаана элбээн, саа-саадах да тупсан иһэрэ көстөр. Онон бу эйгэҕэ туох саҥа киирэн иһэрин көрөр эмиэ интэриэһинэй. Ким кыайыай диэн этэр олус уустук. Былырыын 2 км. холкутук ылар ытааччылар бу сырыыга квалификацияны ааспатылар. Уопсайынан, манныкка баарт тосхойуон наада. Түүҥҥү ытыыга кыттааччыбын, мин гражданскай киһи буоллаҕым, онон булт саатын прицелынан кыттабын. Ол иһин мээнэ хараҥаҕа ытабын, буулдьам ханна тиийбитин көрбөппүн, көннөрү кыттабын, уопут ылабын.

Леонид Архангельскай, Дьокуускай олохтооҕо:

-Быйыл бу бойобуой снайпиҥҥа бастакыбын кытта сылдьабын. Бэҕэһээ 1 км. дистанцияҕа квалификацияны ааспытым, эрчилиннэххэ уустуга суох эбит дии санаатым. Корректировщигым Михаил Ефимов диэн. Кэтээн көрдөххө, олох үчүгэйдик ытар уолаттар бааллар. Бүгүн түүҥҥүгэ кыттаары бэлэмнэнэ сылдьабыт.