Дүллүкүлэри ордук оскуола тутуута уонна гаас киириитэ долгутар

Бүгүн, олунньу 10 күнүгэр, Үөһээ Бүлүү улууһугар Саха Өрөспүүбүлүкэтин Бырабыыталыстыбатын 2025 сыллааҕы үлэтин отчуоттуур мунньаҕын иккис күнэ. СӨ экэниэмикэтин миниистирэ Петр Попов салайар бастакы отчуоттуур бөлөҕө Дүллүкү нэһилиэгин олохтоохторун кытта көрүстэ.

Отчуоттуур мунньах үөрүүлээх түгэнинэн – үлэҕэ ситиһиилээх дьону наҕараадалааһынтан саҕаланна. Ол курдук, «Кустук» оҕо уһуйаанын инструктора Александра Петровна Степановаҕа СӨ үөрэҕин министиэристибэтин Махтал суругун миниистир Нюргуна Соколова туттарда. Ону тэҥэ нэһилиэк дьаһалтатын исписэлииһэ Клавдия Александровна Герасимова СӨ экэниэмикэтин министиэристибэтин Махтал суругунан бэлиэтэннэ.

Мунньах кэмигэр тыа хаһаайыстыбатын боппуруостара сытыытык турдулар. Олохтоох хаһаайыстыба салайааччыта үүт сыанатын үрдэтиини уонна былаан туолбакка бүддьүөккэ төннүбүт үбү туһаныы туһунан ыйытыылары көтөхтө. Экэниэмикэ миниистирэ Петр Попов өрөспүүбүлүкэттэн үүккэ көрүллэр субсидия 65 солкуобай буоларын, онно улуус бэйэтин кыаҕынан эбэн биир лиитирэни 100 солкуобайга тиэрдэрэ хайҕабыллааҕын бэлиэтээтэ. Экэниэмикэ миниистирэ бүддьүөккэ төннүбүт харчы былаан туолбатаҕыттан сылтаан сокуон быһыытынан төннүбүтүн эттэ. Маны таһынан «Меркурий» систиэмэҕэ отчуоттааһын уонна ыанар ынахха көрүллэр субсидияны үрдэтии туһунан этиилэр киирдилэр.

Үөһээ Бүлүү улууһа ааспыт 2025 сылга 2200 туонна үүтү туттарбыт, ол да буоллар былаан туолбатах буолан, хаалбыт харчы өрөспүүбүлүкэ бүддьүөтүгэр сокуон быһыытынан төннүбүт. 2024 сылтан үүт тутуутугар дьиҥнээх көрдөрүүгэ тахсыбыттар, ол түмүгэр 95 мөл. солкуобай өрөспүүбүлүкэ бүддьүөтүгэр төннүбүт.

Нэһилиэк олохтоохторун ордук долгутар боппуруостарынан оскуола тутуута уонна гаас киириитэ буоллулар. Дүллүкү нэһилиэгин баһылыга Николай Романов 160 миэстэлээх оскуола бырайыактааһынын сорудаҕа баттаммытын, үлэ салгыы барарын иһитиннэрдэ. Олохтоохтор эрдэ оҥоһуллубут бырайыак тоҕо туһаныллыбатын ыйыппыттарыгар, миниистир Петр Попов ол бырайыак саҥа ирдэбиллэргэ сөп түбэспэтин уонна кэмигэр үп-харчы баар кэмигэр, «АЛРОСА» дивиденэ түһэр кэмигэр сөптөөх быһаарыныылар ылыллан оскуола тутуллубатаҕа хомолтолооҕун эттэ.

Гаас ситимигэр холбонуу туһунан «Сахатранснефтегаз» АУо сүрүн инженерэ Павел Ксенофонтов бырайыактааһын үлэтигэр тохтоото. Кини эппитинэн, Дүллүкү нэһилиэгэ өрүс уҥуоргу нэһилиэктэртэн биир бастакынан гааска холбонуохтаах, онон быйыл бырайыактааһын үлэтэ түмүктэнэрэ былааннанар.

Нэһилиэк олохтоохторуттан саҥа амбулатория тутуутун туһунан ыйытыы киирдэ. Маныаха СӨ доруобуйа харыстабылын миниистирин бастакы солбуйааччыта Дмитрий Сергин Үөһээ Бүлүү улууһун үрдүнэн Дүллүкү амбулаториятын тутуу үһүс уочаракка турарын эттэ.

Бу суолталаах эбийиэк «Доруобуйа харыстабылын бастакы сүһүөх звенотун саҥардыы» (Модернизация первичного звена здравоохранения) национальнай бырайыак чэрчитинэн былааҥҥа киирдэ. Саха сирин үрдүнэн барыта 150-тан тахса мэдисиинэ эбийиэгин саҥардыы былааннанар.

Бэлиэтээн эттэххэ, бүтэһик 5 сыл иһигэр «Доруобуйа харыстабыла» национальнай бырайыак көмөтүнэн өрөспүүбүлүкэбит үрдүнэн 100-тэн тахса саҥа доруобуйа харыстабылын эбийиэктэрэ тутуллан үлэҕэ киирдилэр.

Мунньах кэмигэр өссө уот төлөбүрүн, олох-дьаһах, босхо эми ылыы боппуруостара көтөҕүлүннүлэр. Бары этиилэр боротокуолга киирэн, Бырабыыталыстыба өттүттэн болҕомтоҕо ылылыннылар.