Дьылы атаарыы, сайыны көрсүү

Ыам ыйын 15 күнэ. Дьылбыт түмүктэнэрэ 7 хонук хаалбыт. Ол аата саха саҥа сыла саҕаланыа эмиэ 7 күн баар. Иллэрээ күн улуус култууратын салаатын үлэһиттэрэ иһитиннэрбиттэринэн, быйыл Ньурба улууһун бары тыаларыгар сайыны көрсүү, дьылы атаарыы бары кыстыктарга тэриллиэхтэрэ үһү.

Мээрийэлэр уонна антоновкалар чопчу оҥороллорун бигэтик билэбин, кыттыһа сылдьабын. Ол эрээри, диирбэр тиийэбин, тыалары кытта кэпсэтэ сырыттым уонна ол улуустааҕы култуура салаатын үлэһиттэрэ дьиҥнээхтик сайыны көрсүү, дьылы атаарыы сиэрин-туомун оҥорбокко көннөрү оһуохай күннэрин тэрийээри тииһэллэр эбит. Дьылы түмүктүүр дьоро бэлиэ күнү билбэттэр диэн өйдөөтүм. Көннөрү оһуохай дьиҥнээх саха итэҕэлинэн сайыны көрсүү, дьылы түмүктээһин, саҥа саха сылын көрсүү сиэрин-туомун солбуйбата биллэр.

Өйүүн, били, муус устар устата улууспут тыаларынан кэрийэ айаннаан олохтоохтору кытта кэпсэтиибит түмүгүн улуустааҕы тыл сүбэтин мунньаҕар дьүүллэһиэхпит. Онтон үөрдүм. Сайын чугаһаан киһи таһырдьаттан дьиэҕэ киириэн баҕарбат күннэрэ үүнэн тураллар. Бөөлүүн күүстээх сылаас ардах түһэн халлааммыт “һуу” гынан чэпчээбит көрүҥнээх. Тиэргэн ото көҕөрөн эрэр. Тыыраахылар, хоптолор, чуускуннар, лоокууттар обургулар бары кэлэн мин көрөрбүнэн, дьыл эрдэлээн эрэр курдук. Бүлүү эбэ мууһа улаханнык харан Дьаархаҥҥа, Антоновка ньиэп баазатыгар уонна Убайааҥҥа дьону ыксата сырытта. Күргэлэрбит түөрэ бары уунан бүрүллэ сырыттылар. Дьобуруопалары үтүктэн уонча сыллааҕыта биһиги, ньурбалар (Попов Б.Н.) киирэн 60 саастаахтан үөһээ кырдьаҕастар дьоҕус күрэхтэһии 10-ча көрүҥэр Бүлүү сүнньүн кырдьаҕастарын ортотугар бэртээхэй күрэхтэһиилэри тэрийэн саҕалаабыппыт. 2 сыл дьаҥҥа эрэ тохтообуппут. Быйылгы ахсыс күрэхтэһиибит Үөһээ Бүлүүгэ бэс ыйын 8-9 күннэригэр буолуохтаах. Үөһээ бүлүүлэр элбэх уларытыыны киллэрдилэр. Утум сүүрүүгэ урут биэс киһи 400 м сүүрэр эбит буоллаҕына, быйыл алта буолан 600 м сүүрүллүөхтээх. Сахавол диэн күрэхтэһии саҥа көрүҥүн эмиэ үөһээ бүлүүлэр айбыттар быһылаах, хомуур хапсаҕай курдук.

Дьылы түмүктүүр биир бэртээхэй “Арыылаах” тэрилтэ баар. Сыл аайы оттук дьылын түмүктүүллэр. Мин эмиэ көтүппэппин. Улууска биир чаҕылхай, сахалыы тыыннаах тэрилтэ буолар. Улуус киинигэр бэс ыйын саҕаланыыта оҥоруохтара, Киирэпкэ. Онон урааҥхай сахалар сайын чугаһаабычча күҥҥэ көһү хаамыҥ. Эһэлэр, эбэлэр, төрөппүттэр оҕолорбутун, сиэннэрбитин барыларын сахалыы үөрэтиэҕиҥ! Сахаларга айхал! Урааҥхайдарга уруй!

Бигэ Өрөкүй Бааһынай Уола.