Дүпсүн дьонун үтүө үгэһэ

Дойдубар, Уус Алдан улууһугар Дүпсүҥҥэ, кырдьаҕастарга, байыастарга көмөлөһөр үлэ тиһиктээхтик салҕанар. Олохтоох дьаһалта сүрүннүүр исписэлииһин Мария Спиридонованы кытары төлөпүөнүнэн кэпсэтиибэр истибит сонуммун ааҕааччы сэҥээриитигэр таһаарабын.

Нэһилиэк салалтата баһылык Н.Н.Сивцев көҕүлээһининэн, нэһилиэнньэни кытта сүбэлэһэн, дьокутааттар уонна тэрилтэлэр салайааччыларын кытары мунньахтаан баран, кырдьаҕастарга көмөлөһөр туһуттан Саҥа дьыл бырааһынньыгын иннинэ үтүө санаа аахсыйатын тэрийэн ыытар буолбуттара хаһыс да сылыгар барбыт. Оттон быйылгыттан, аны, байыаннай дьайыыга сылдьар биир дойдулаахтарыгар көмөлөһөр, өйөбүл буолар сыал-сорук туруорунан ылсыбыттар.

Уопсайынан, олохтоохтор кырдьаҕастарга, бэтэрээн үлэһиттэригэр ким туохха наадыйарын көрө сылдьан, муустарыгар, мастарыгар, сорохторго харчынан кыттыһан, сылы эргиччи көмөлөһөллөрө үтүө үгэс буолбут. Маны барытын олохтоох салалта сүрүннээн биэрэр эбит.

Биһиги дьиэ кэргэн, Дүпсүн нэһилиэгин Бээдитээҕи учаастагын төрүт олохтоохторо, Дьокуускайга көһөн олохсуйбуппут 19 сыл буолла. Бээди оскуолатыгар төрдүс кылааһы бүтэрбит кыра уолбут быйыл байыаннай дьайыы кыттыылаахтарын кэккэлэригэр бэйэтин баҕа өттүнэн баран, сулууспалыы сылдьар. Онуоха биир дойдулаахтарбыт умнубаттар эбит диэн махталбытын биллэрэбит. Саха чулуу уолаттарыгар — байыастарга болҕомто ууруллара Уус Алдан улууһугар Дүпсүҥҥэ үтүө үгэскэ кубулуйда. Итиэннэ атыттарга холобур буолар.

Үйэлэргэ өлбөөдүйбэт өйдөбүл буолан, дүпсүннэр дуо дэтэн, үтүө үгэс көлүөнэттэн көлүөнэҕэ бэриллэн иһиэҕэ диэн алҕаатаҕым буолуохтун. Ким да умнуллубат, туох даҕаны умнуллубат.

Иван Сивцев — Бээди