Дүпсүҥҥэ буойун кэриэһигэр күрэхтэһии ыытылынна

2022 сыл күһүнүгэр быстах хомуурга Уус Алдан улууһун Дүпсүнүттэн Слава Кудрин ыҥырыллан, дойдутун туһугар иэһин төлүү аттаммыта. Бу иннинэ 1994-95 сс. Чечня сэриитигэр сыл устата сэриилэспит, уопуттаах сэрииһит этэ.

Вячеслав Владимирович Кудрин Уус Алдан Дүпсүнүгэр 1976 с. олунньу 29 күнүгэр 5 оҕолоох дьиэ кэргэҥҥэ маҥнайгы оҕонон күн сирин көрбүтэ. Ийэтэ Наталья Иннокентьевна, аҕата Владимир Семенович Кудриннар. Эһэтэ Иннокентий Сергеевич Стручков I уонна аҕата Владимир Семенович байанайдаах булчуттар буолан, кыра Славаны булка-алка уһуйбуттара. Үлэһит, сүрэхтээх дьиэ кэргэҥҥэ иитиллэн бэйэтэ да араас үлэҕэ сыстаҕас, булт диэн баран муннукка ытаабыт эр бэрдэ буола улааппыта. Дьөһөгөй оҕотугар сыстыгаһа, таптаан миинэр миҥэ оҥосторо.

Слава киһи быһыытынан көнөтө, элэккэйэ, доҕотторугар бэриниилээҕэ, билиҥҥэ диэри доҕотторо сүрдээҕин суохтууллар, ахталлар, тулаайах хаалбыт ийэтигэр күүс-көмө буолаллар. Эдэркээн сааһыгар икки сэрии уоттаах толоонугар инники кирбиигэ сэриилэһэн, сүрэҕэ тулуйбакка бу олохтон эрдэ барбыта сүрдээх хомолтолоох.

Слава ыччат лиидэринэн, спортинструкторынан үлэлии сылдьыбыта. Успуордунан сөбүлээн дьарыктанара. 2019 с. волейболга бэтэрээннэргэ улуус чөмпүйүөнэ буолан үөрбүттээҕэ. Түөлбэтин, нэһилиэгин чиэһин элбэхтэ араас күрэстэргэ туруулаһан көмүскээбитэ, куруук түмэр, тэрийэр лиидэрдии майгылааҕа. Наҕараадалара:

1. «Участник боевых действий на Кавказе» мэтээл.
2. «Защитник Отечества» мэтээл.
3. «За бои в Чечне» бэлиэ знак.
4. «За боевые заслуги» мэтээл.
5. «25-летие Чеченской войне» мэтээл.
6. «25 лет Ассоциации ветеранов боевых действий органов внутренних дел и войск РС (Я)» үбүлүөйнэй мэтээл.

Вячеслав Владимирович бу олорон ааспыт кылгас олоҕор, баара-суоҕа 47 сааһыгар икки сэрии уот кутаатын ортотунан бойобуой эбээһинэһин чиэстээхтик толоро сылдьан, 2023 с. улахан эчэйиини ылан дойдутугар эргиллибитэ.

Олунньу 21-22 күннэригэр  икки бойобуой сэрии кыттыылааҕа, бэтэрээнэ Вячеслав Владимирович Кудрин сырдык кэриэһигэр Уус Алдан Дүпсүнүгэр икки күннээх бойобуой дьайыыга сыһыаннаах күрэс ыытылынна.

Маҥнайгы күн оскуола оҕолоругар олус тыҥааһыннаахтык ааста. Күрэһи Вячеслав Кудрин аймахтара, бииргэ үөрэммит үөлээннээхтэрэ тэрийэн, спонсордаан ыыттылар.

Күрэс икки бөлөҕүнэн барда: 5-7 кылаас уонна 8-11 кылаас уолаттарыгар. Уопсайа 12 уол күөн көрүстүлэр, 6 түһүмэҕинэн барда: “Я – патриот” презентация, Калашников аптамаатын ыһыы-таҥыы, аптамаат маҕаһыынын ботуруонунан толоруу, сыал ытыыта, ОПФ уонна Вячеслав Кудрин олоҕун биографиятыгар викторина.

Күрэс түмүгүнэн 5-7 кылаастарга:

1 миэстэ — Шелковников Дамир, 5 кылаас

2 миэстэ — Прибылых Вова, 7 кылаас

3 миэстэ — Соловьев Сайаан, 5 кылаас

8-11 кылаастарга:

1 миэстэ – Неустроев Олег, 11 кылаас

2 миэстэ – Жирков Антон, 8 кылаас

3 миэстэ – Жирков Артем, 10 кылаас

Күрэс сүрүн судьуйата Кудрин Г.Г., оскуола, технопаарка учууталлара уонна нэһилиэк спортинструктора Сивцев В.Н. дьүүллээн ыыттылар.

Уол оҕо эт-хаан өттүнэн кыахтаах буоларыгар, ыарахаттары тулуйарыгар, киэҥ билиилээх,  төрөөбүт дойдутугар бэриниилээх буоларыгар күрэспит олук буолар.

Олунньу 22 күнүгэр, иккис күн Вячеслав Владимировичка аналлаах мемориальнай дуоска аһыллыыта үөрэммит оскуолатыгар ыытылынна.  Дьон-сэргэ тоҕуоруһа мустан, Слава Чечняҕа, Украинаҕа байыаннай дьайыыга бииргэ сулууспалаабыт бойобуой доҕотторо кыттыылаах, долгутуулаах түгэн буолла.

Аһыллыыны  Светлана  Нартахова иилээн-саҕалаан бэркэ ыытта. Ордук кырачаан сиэн балта Гульнара Соловьева иитээччилэрэ Любовь Николаевна, Анна Даниловна Прибылыхтар айбыт, таайыгар аналлаах хоһоону, олус чобуотук ааҕан барыбытын долгутта. Эҕэрдэ, махтал, Слава туһунан ахтыылары нэһилиэк баһылыгын солбуйааччы И.И.Федоров, кылааһын салайааччыта А.С.Атласова, оскуола урукку дириэктэрэ Г.Г. Сивцев, Слава ийэтэ Наталья Иннокентьевна, бииргэ төрөөбүттэрэ эттилэр.

С.В. Скрябин бойобуой хамандыыра Слава ийэтигэр, нэһилиэк баһылыктарыгар, оскуола дириэктэригэр Н.А.Дорофееваҕа, чугас доҕоругар Н.Н.Новгородовка бойобуой дьайыы бэтэрээннэрин түмсүүтүн аатыттан махтал суруктары туттартаата.

“Эдэр байыас” күрэс оскуола үөрэнээччилэрин бириистэрин “Күлүмнүүр” аатынан технопаарка дириэктэрэ Г.Г.Кудрин туттартаата. Мемориальнай дуосканы оскуола дириэктэрэ Н.А.Дорофеева, учуутала А.С.Атласова, ийэтэ Н.И.Кудрина ытыс дохсун тыаһа доҕуһуоллаах арыйдылар. Бу күрэс ааптарынан оскуола учуутала Протопопова О.Ф. буолар.

Эбиэттэн киэһэ “Дүөндү”  сынньалаҥ киинигэр улахан дьоҥҥо бойобуой доҕотторо кыттыылаах буулдьанан ытыыга күрэс ыытылынна. Тэрээһин арчылааһынтан, ыраастааһынынан саҕаланна. Дүпсүн нэһилиэгин бочуоттаах олохтооҕо алгысчыт У. И. Босикова сыт таһааран алгыстаан арчылаата.

Кэлбит байыастарга Слава сиэн балта Алимпия Акимова махтал сурук туттартаата,  Е П Алексеева салайар «Далбар» бөлөх илиилэрин сылааһын анаабыт  харысхалларын кэтэртилэр.

Тыҥааһыннаах күрэскэ  барыта 45 киһи кытынна.

Дьахталларга 40-гэр диэри саастаахтарга:

1 миэстэ – Горохова М.П.

2 миэстэ – Тролукова А.А.

3 миэстэ – Шелковникова У.Р.

40-тэн үөһэ саастаахтарга:

1 миэстэ – Бочкарева Н.Г.

2 миэстэ – Потапова А.В.

3 миэстэ – Алексеева М.И.

Эр дьоҥҥо 50-гэр диэри саатаахтарга:

1 миэстэ – Соловьев Т.Е.

2 миэстэ – Барабанскай Р.И.

3 миэстэ – Герасимов М.П.

50-тэн үөһэ саастаахтарга:

1 миэстэ – Дорофеев А.Дм.

2 миэстэ – Гоголев В.П.

3 миэстэ – Сивцев Ю.А.

Бойобуой дьайыылар бэтэрээннэригэр:

1 миэстэ – Алексеев Г.С.

2 миэстэ – Степанов П.П.

3 миэстэ – Попов Ф.М.

Муҥутуур кыайыылааҕынан Чечня сэриитин бэтэрээнэ, Дүпсүн нэһилиэгин баһаарынай сулууспатын байыаһа Гаврил Семенович Алексеев буолла.

Бойобуой доҕотторо олохтообут, ООО «Экоферма Туймаада» анал бирииһин Дүпсүн нэһилиэгин  баһаарынай чааһын начаалынньыга Александр Дмитриевич Дорофеев тутан үөрдэ.

Күрэһи Кудрина О.М. салайан ыытта, сүрүн судьуйанан Алексеев Г.С. үлэлээтэ, күрэһи Кудрин Г.Г.  сэргэхтик комментарийдаан ыытта.

Тыҥааһыннаах күрэһи Айсен Васильев,  Владимир Кудрин,  Февронья Аммосова ылбаҕай ырыаларынан киэргэттилэр.

Бу икки күннээх Вячеслав Кудрин сырдык кэриэһигэр анаммыт тыҥааһыннаах күрэс аны сыл аайы ыытыллара былааннанар. Дүпсүн нэһилиэгин дьаһалтата, нэһилиэк олохтоохторо, үөрэммит оскуолата, бойобуой доҕотторо, бииргэ үөрэммиттэрэ, аймах-билэ дьоно-сэргэтэ бука бары турунан туран, көмөлөөн сыаналаах бириистэри туруортаан түмсүүлээхтэрин көрдөрдүлэр.

Чечня, Украина бойобуой дьайыытын сэриилэрин кыттыылааҕа, бэтэрээнэ, дойдутун туһугар чахчы патриот буойун Вячеслав Владимирович Кудрин киһи быһыытынан кэрэмэһэ, доҕотторугар бэриниитэ,  төрөөбүт Дүпсүнүгэр таптала үйэлээх кэриэс буолан бар дьонун сүрэҕэр хаалыа.

Агафья Сивцева-Дүпсүүнэ, суруналыыс,

Дүпсүн нэһилиэгин бочуоттаах олохтооҕо

Олунньу, 2025 с.