Дүпсүҥҥэ таас дьиэ үлэҕэ киирдэ

Бүгүн, олунньу 13 күнүгэр, Дүпсүҥҥэ 3 этээстээх 20 кыбартыыралаах таас дьиэ үлэҕэ киирдэ.

Үөрүүлээх аһыллыыга саҥа дьиэҕэ киирэр кыһыл лиэнтэтин СКА «Дохсун» ХЭТ дириэктэрэ Арсен Ермолаев, ситэриилээх былаас отчуотун үһүс бөлөҕүн салайааччыта, тутууну хонтуруоллуур управление салайааччыта Павел Аргунов, саҥа дьиэҕэ кыбартыыра ылбыт Надежда Ивановна Сивцева, улуус баһылыгын солбуйааччы
Анатолий Сторожев, Дүпсүн нэһилиэгин баһылыга Николай Сивцев кырыйдылар.

Бу тыа сиригэр тутуллубут таас дьиэ «Хаарбах дьиэлэри дьону көһөрүү» бырагырааманан тутулунна.

Алексеева Прасковья Николаевна үөрэҕин бүтэриэҕиттэн Дүпсүн амбулаториятыгар 33 сылын үлэлиир. Ол тухары 12 кыбартыыралаах дьиэҕэ олорбут.

«Наһаа үөрдүм, икки хостоох кыбартыыраны ыллым. Барҕа махталбытын тиэрдэбит бу бырагырааманы олоххо киллэрбит дойдубут, өрөспүүбүлүкэбит, улууспут салалталарыгар. Өр сылларга сүүрэн-көтөн, саҥа дьиэ тутуутун тиһэҕэр тиэрдибит нэһилиэкпит баһылыгар Николай Сивцевкэ уонна солбуйааччытыгар Иван Федоровка барҕа махтал».
Амбулатория эдэр үлэһитэ Надежда Парникова эмиэ саҥа кыбартыыраҕа тиксэн үөрүүтэ муҥура суох. Кини 2018 сыллаахха Дьокуускайдааҕы медкэллиэһи бүтэрэн баран, идэтинэн үлэлээбит. Дүпсүҥҥэ быйыл үлэлии кэлбит. Бу саҥа киирбит дьиэҕэ биир кыбартыыра муниципалитекка бэриллибит, ону бу эдэр исписэлиискэ биэрбиттэр. «Олус үөрэбин, махтанабын Дүпсүн нэһилиэгин дьаһалтатыгар. Саҥа дьиэҕэ эрэнэн кыбартыыра биэрбиттэригэр, үлэлиэхпит«,- диэн үөрэ-көтө санаатын үллэстэр эдэр исписэлиис.

Дьэ маннык бэртээхэй бырагыраама киирэн, куораттарга эрэ буолбакка тыа сиригэр толору хааччыллыылаах саҥа таас дьиэлэр үлэҕэ киирэннэр, исписэлиистэр тыа сиригэр үлэлии хаалаллар.

Ааптар хаартыскаларга түһэриитэ