Дүпсүннэр биир сомоҕонон үтүө дьыала аахсыйатын тэрийдилэр

Сэтинньи 8 күнүгэр Уус Алдан улууһун Дүпсүн нэһилиэгин олохтоохторо биир киһи курдук түмсэн, байыаннай дьайыы кыттыылаахтарыгар анаммыт «Бары бииргэ – биир сомоҕо» диэн ааттаах киэҥ далааһыннаах үтүө дьыала аахсыйатын тэрийэн ыыттылар.

Тэрээһин “Дүөндү” сынньалаҥ киинигэр буолла. Бу күн киин түһүлгэтигэр тэриллибит атыы-тутуу дьаарбаҥкатыгар сир аһыттан, күһүҥҥү уурууттан саҕалаан, тэрилтэлэр, төрөппүттэр, оҕо-аймах бэйэлэрэ астаабыт араас минньигэс астара дэлэччи тардыллан, нэһилиэк олохтоохторун үөртэ-көтүттэ. Кыттааччылар ордук аукциону сэргээтилэр. Манна Баай Байанай бэлэҕэ, кыһыҥҥы идэһэ күндүтэ оонньонно. Ону сэргэ, мустубут дьон-сэргэ уһуйаан иитиллээччилэрэ, оскуола үөрэнээччилэрэ, тэрилтэ үлэһиттэрэ, түмсүүлэр толорбут эҕэрдэ кэнсиэртэрин истэн- көрөн дуоһуйдулар. Тэрээһин түмүгүнэн, биир дойдулаахтарбытыгар көмө быһыытынан, уопсайа 91 850 солкуобай үп-харчы хомулунна.

Дүпсүннэр бука бары биир санаанан, дойдуларын көмүскэлигэр турбут уолаттарыгар көмөлөһөр баҕа санаалаахтарын дакаастаатылар. Бу үтүө тэрээһини иилээн-саҕалаан ыыппыт “Дүөндү” сынньалаҥ киинин аатыттан “Уран тарбахтар”, “Туллук – эйэ уонна үтүө санаа бэлиэтэ”, “Дүпсүн эһигинниин бииргэ” волонтерскай түмсүүлэргэ, бары тэрилтэлэр кэлэктииптэригэр, оскуола оҕолоругар, Дүпсүн уонна ыаллыы Бээди нэһилиэктэрин олохтоохторугар дириҥ махталбытын тиэрдэбит. Бар дьоммутугар, уолаттарбытыгар инникигэ эрэллээх, чөл туруктаах, доруобай уонна дьоллоох олоҕу баҕарабыт!

Светлана Нартахова, “Дүөндү” сынньалаҥ киинин уус-уран салайааччыта.