Дүпсүннэр уонтан тахса хаххалыыр сиэккэни бэлэмнээтилэр

Уус Алдан улууһун Дүпсүн нэһилиэгин олохтоохторо, чуолаан «Сардаҥа» оҕо уһуйаанын иитиллээччилэрэ уонна үлэһиттэрэ Дьокуускайга уонна Бороҕоҥҥо Арассыыйа үрдүнэн ыытыллыбыт волонтердарга аналлаах тэрээһиҥҥэ көхтөөх кыттыыны ылбыттара.

Бу туһунан уһуйаан иитээччитэ Алёна Сыроватская сырдатта.

—Биһиги бу улахан тэрээһиҥҥэ хайдах кыттарга эрдэттэн сыал-сорук туруоруммуппут. Бороҕоҥҥо ыытыллыбыт тэрээһиҥҥэ уһуйааммыт сэбиэдиссэйэ Галина Алексеевна Бочкарева уонна иитээччи Ньургуйаана Петровна Ушницкая «Туллук — эйэ уонна үтүө санаа бэлиэтэ» диэн араас хайысхалаах элбэх үлэни кэпсээтилэр, туллугу оҥорорго маастар-кылаас ыыттылар.

Маны сэргэ, «Дүпсүн эһигинниин бииргэ» волонтёрдар түмсүүлэригэр 11 хаххалыыр сиэккэлэри бэлэмнээтибит. Манна нэһилиэк тэрилтэлэрин үлэһиттэрэ таҥаһы кырыйан бэлэмнээн истилэр. Сиэккэ өрүллэр таҥаһын харчытын аахсыйа тэрийэн, онно дьон-сэргэ көмөлөһөн, өйөөн ылбыппыт. Аахсыйаҕа уһуйаан оҕотуттан нэһилиэкпит кырдьаҕаһыгар тиийэ кытыннылар. Улахан кэнсиэр, атыы-тутуу дьаарбаҥката ыытыллан, 137 тыһ. харчынан киирбитэ. Бу харчыттан байыаннай дьайыыга сылдьар уолаттарбытыгар ыытыллыбыта. Дьаарбаҥкаҕа уонна оонньууга дьоммут-сэргэбит бары ас-үөл астаан аҕалбыттара, хаһаайыстыбаҕа наадалаах туттар тэриллэри оҥорон аҕалбыттара. Онон бука бары түмсэн, сомоҕолоһон көмөлөөтүбүт, — диэн сырдатта.

Тэрээһини өрөспүүбүлүкэ уһуйааннарын «Туллук — эйэ уонна үтүө санаа мэктиэтэ» бырайыагын кыттыылааҕа «Сардаҥа» уһуйаан уонна Н.Е. Корнилов аатынан олохтоох култуура дьиэтэ тэрийэн үрдүк ыыппыттар.

Иван Сивцев-Бээди

Хаартыскалары Пелагея Соловьева ыытта