Дьүрүйээнэ Турция киинэтигэр уһуллубут

Юлияна Кривошапкина-Дьүрүйээнэ “Men Jelaleddin” (“Мин аатым Джелал ад-Дин”) диэн ааттаах Узбекистан уонна Турция холбоһуктаах  сэрийээлигэр уһуллубута билиннэ. Маны Саха сирин олохтоохторо “Сапфир” теле-ханаалга сэрийээл үһүс сиэрийэтигэр көрдүлэр.

Bozdag film киинэ хампаанньа улахан үптээх бырайыагар Турция уонна Узбекистан биллиилээх артыыстара оонньууллар. Бу киинэҕэ Ануштегенидтар династияларын тиһэх хорезмшаҕа Джелал ад-ДинМагуберды олоҕун туһунан кэпсэнэр. Бу бэйэтин кэминээҕи улуу баһылык уонна сэрииһит Чыҥыс Хаан сэриитин утары турбутунан биллэр.

Дьүрүйээнэ 2013 сыллаахха Турцияҕа Силифке куоракка ыытыллыбыт Түүр тыллаах омуктар эстраднай толорооччуларын бэстибээлигэр Гран-при хаһаайката буолбута, онтон ыла түүр тыллаах норуоттар олорор дойдуларыгар киэҥник биллэр артыыс.