Дьүрүйээнэ Турция киинэтигэр уһулунна

Тохсунньу 23 күнүттэн Арассыыйа киинэ тыйаатырдарыгар «Холоп. Великолепный век» диэн киинэ таҕыста. Бу киинэҕэ биһиги биир дойдулаахпыт, виртуоз-хомусчут Юлияна Кривошапкина-Дьүрүйээнэ удаҕан оруолугар уһулунна. Бу киинэҕэ Турция киинэтин сулуһа Керем Бюрсин эмиэ уһуллубута. Кинини Арассыыйа көрөөччүтэ «Постучись в мою дверь» сериалга Серкан Болат оруолугар уһуллубутунан билэр.

Арассыыйа көрөөччүлэрэ «Холоп» диэн киинэни үчүгэйдик билэллэр. Аныгы кэм баай-тот, «мажор» уолун үөрэтэ таарыйа, былыргы кэмҥэ түспүт курдук оҥороллоор. Уол чахчы былыргы кэмҥэ сылдьабын диэн итэҕэйэр, араас мүччүргэннээх түбэлтэлэргэ түбэһэн, олоҕу көрүүтэ, майгыта уларыйар.

Оттон бу «Холоп. Великолепный век» киинэ — «Холоп» киинэни туроктар уларытан уһулбуттар. Ол аата ис хоһооно биир, Стамбул куоракка олорор, баай тойон нэһилиэнньигэ XVI үйэтээҕи османскай куоракка түбэспит курдук оҥорбуттар.

Юлияна Турция номнуо үһүс киинэтигэр уһуллар. Бу иннинэ «Я и есть Джелаладдин» сериалга, «Курулуш Осман» киинэҕэ уһуллубута.

— Продюсердар түүр норуоттарын култуураларын уратыларын көрдөрүөхтэрин баҕарбыттара, онно миигин ыҥырбыттара. Бу кэмиэдьийэ буоларын быһыытынан, күүскэ хаһыытаан-ыһыытаан, сүрүн дьоруойу Керем Бюрсины куттуур курдук оонньуурбар эппиттэрэ. Ону мин оонньоотоҕум дии.  Кылгастык көстөр оруол буолан, түргэнник уһулбуттара, режиссер астыммыта, хайҕаабыта.

Мин маннык улахан бырайыакка уһуллубуппун хаһан да умнуом суоҕа. «Курулуш Осман» киинэҕэ Бурак Озчивит уонна Керем Бюрсин курдук Турция сулустарын кытта уһуллары элбэх кэрэ аҥаар ыраланара буолуо. Bozdag Film хампаанньа устуудьуйа уораҕайыгар уһуллубуппут, хайдах эрэ остуоруйаҕа сылдьар курдук этим. Дьиктитэ диэн, төрөөбүт күммэр уһуллубутум, — диэн Дьүрүйээнэ кэпсээтэ.