“Эбэ, эһэ сайыҥҥы оскуолата” лааҕыр үлэлээтэ

Оҕолорбут, сиэннэрбит алта күннээх «Эбэ, эһэ сайыҥҥы оскуолатын» аастылар.

Улуустааҕы  бэтэрээннэр сэбиэттэрин «Мындыр саас – кырдьыы култуурата» бырайыагын чэрчитинэн 1-кы Тыыллыма нэһилиэгин баһылыга Руслан Афанасьев өйөбүлүнэн «Эбэ, эһэ сайыҥҥы оскуолата» лааҕыр тэриллэн үлэлээтэ.

Лааҕыр үлэтигэр  сүрүннээн элбэх оҕолоох ыаллар, анал байыаннай дьайыы кыттыылааҕын дьиэ кэргэттэрэ,  салайааччылар,  бэйэбит сиэннэрбит уонна оҕолорбут кытыннылар. 6 күн устата саха сиэрин тутуһуннаран, оҕолор астына сынньаннылар, оонньоотулар, билбэтэхтэрин билэн үөрүүлэрэ үгүс.

Николай Игнатьев тиэргэнигэр быйыл саҥа балаҕан туттан, онно эһэтэ Байбал Уус уһанар тэриллэрин быыстапкалаан түмэл оҥорбутун көрөн-истэн сэҥээрдилэр, махтаннылар.

Лүкээрики алааһыгар Виктор Корякин илим үтэн, балык ылан, илим диэн тугун билбэт оҕолор балык арааран, ону хатырыктаһан, маска үөлэри билэн, кутааҕа сырайан буһаран, оллооҥҥо буспут балык миинин иһэн, саха тэҥэ суох буоллулар.

Иван Кривогорницын тыынан уһуннаран, бэйэлэрин эрдиннэрэн күөлгэ устар хайдаҕын биллилэр.

Лоомтукаттан 21 км ыраах Улуу Тоҕой сиригэр, Куччах алааһыгар ХИФУ преподавателэ, бэрэпиэссэр  Галина Семёновна-Санаайа уонна Алексей Алексеевич Поповтар сайылыктарыгар тиийэ айаннаатылар. Айаннаан иһэн Манчаары Баһылай Хатыҥ Ураһа дьонун кэтээн көрөн тохтоон сыппыт сиригэр өйдөбүнньүк туруоруллубутун көрдүлэр.

Мария ПРОКОПЬЕВА- ТЫЫЛЛЫМААНА