Эбээлэр оҕо көрөргө уоппуска ылыахтарын сөп дуо?

Оҕону көрөргө уоппусканы ийэ эрэ ылыахтаах диэн буолбатах. Сокуон быһыытынан аҕа, эбээ, эһээ, атын аймахтар эбэтэр эппэкииннэр эмиэ уоппуска ылыахтарын сөп диэн объясняем.рф саайт суруйар.

Игирэ оҕолор күн сирин көрбүт буоллахтарына, ыалтан икки киһи уоппуска ылар бырааптаах. Холобура, ийэ уонна эбээ.

Өскөтүн эбээ үлэлиир уонна сиэнин көрөргө-истэргэ санаммыт буоллаҕына, үлэ биэрээччитигэр маннык докумуоннары илдьэр:

• оҕо төрөөбүтүн туһунан туоһу суругу;
• сиэни кытта аймахтыы буоларын бигэргэтэр докумуону. Холобура, уолун эбэтэр кыыһын төрөөбүттэрин туһунан туоһу суруктарын;
•  тус сайабылыанньаны;
• босуобуйаны ылар туһунан сайабылыанньаны;
• оҕо ийэтэ уонна аҕата үлэлэриттэн уоппускаҕа барбатахтарын уонна босуобуйа ылбаттарын туһунан ыспараапканы.

Эбээ үлэлиир буоллаҕына, ый аайы көрүллэр төлөбүр ылар — сиэнин балтараа сааһыгар диэри босуобуйаны.