Эбээн Бытантай олохтооҕо таба тириитинэн альбом тикпит

Эбээн Бытантай улууһун Дьарҕаалаах нэһилиэгиттэн бэйэ дьарыктаах,  худуоһунньук-маастар Элина Гузаирова Саха сиригэр Норуот маастарын күнүн чэрчитинэн быыстапкаҕа байыаннай дьайыы уонна Аҕа дойду Улуу сэриитин кыттыылаахтарыгар аналлаах өйдөбүнньүк альбому оҥорбутун билиһиннэрдэ. Экспозиция киин куорат А.Е. Кулаковскай аатынан Норуоттар доҕордоһууларын дьиэтигэр туруорулунна.

Маастар таба тириитинэн дьарыктаммыта ырааппыт. Билигин оҥоһуктарын чочуйан таһаарыыга таба тириитин сүрүн матырыйаал быһыытынан туһанар. Быйыл кини альбому лоскуй уруһуйдартан тигэргэ быһаарыммыт.

«Мин оҕо сааһым табаһыттар дьиэ кэргэттэригэр ааспыта. Кыра эрдэхпиттэн ийэм, Христина Семеновна Захарова, миигин иистэнэргэ, тирии имитэргэ үөрэппитэ. Мин бу быыстапкаҕа номнуо үһүс сылын кыттабын. Бэйэм үлэлэрбэр ордук таба тириитин туһанабын. Бу матырыйааллар миэхэ олус чугастар», — диэн Элина Гузаирова кэпсээбитин СИА суруйар.