Эбээн Бытантайга дьахтар маҕаһыынтан 40 тыһ.солк. суумалаах арыгыны уорбут

Эбээн Бытантай улууһун олохтооҕо дьахтар маҕаһыынтан арыгы уоран сууттанна. Бу туһунан СӨ Борокуратууратын пресс-сулууспата иһитиннэрэр.

Суут быһаарбытынан, быһылаан бу сыл ыам ыйыгар буолбут. Дьахтар итирик туруктаах сылдьыбыт. Кини өссө икки киһини кытта арыгы атыыланар маҕаһыыныгар уоран киирбиттэр. Дьиэ кырыысатынан киирэннэр, 40 тыһ.солк. суумалаах арыгыны уорбуттар.

Суут борокуруор санаатын учуоттаан, буруйданааччы дьахтары 280 чаас күһэлэҥ үлэҕэ анаата. Уорууга кыттысгастаах өссө биир киһи дьыалатын туспа көрүөхтэрэ, оттон иккис киһи өлбүтүнэн дьыалатын саппыттар.