Эбэтэ — учуутала уонна арыалдьыта

Бүтэһик күн оҕолор сүүрүүлэрин көрөн баран, бөлөхтөрүгэр бастакынан кэлбит оҕолору кытта сэһэргэһэн ааһары, “Өрөгөй” спортсменнары бэлэмниир киин иккис мэндиэмэниттэн аллара ааҥҥа түһэбин. Аттыбар саастаах дьахтар (арааһа, тириэньэр быһыылаах диэн өй охсуллан ааста) эмиэ бэйэбэр дылы кими эрэ кэтэһэр. Арай, бу турдахпытына, иһирдьэттэн оҕолор тахсыталаатылар, биир кыыс ала-чуо мин аттыбар турар тириэньэргэ тиийдэ. Чочумча кэтэһэ түһэн баран кэпсэтэргэ сорунан кинилэр диэки хардыылыыбын. Кэпсэтэн билбитим, бу сиэннээх эбэ эбит. Хайдах? 

Есения Скорая олимпиадаҕа Мурманскай уобалас аатыттан кытта кэлбит. Североморскай куорат гимназиятын 10-с кылааһын үөрэнээччитэ. Кыратын көрүмэҥ, номнуо төрдүс олимпиадатыгар кыттар!

— Мурманскай уобаластан быйыл иккиэ буолан кэллибит. Иван Решетников уонна мин. Физкултуура олимпиадатыгар 7-с кылаастан төрдүс төгүлүн кыттабын. Бу иннинэ Екатеринбурга, Нижнэй Новгородка, Ульяновскайга ыытыллыбыт олимпиадаларга кыттыбытым. Иккитэ миэстэлэһэн турабын. Быйыл орто көрдөрүүлээх иһэбин. Үчүгэй түмүгү көрдөрөргө бу курдук барар сөптөөх. Бүгүҥҥү 500 миэтэрэ судургута суох дистанция. Бэйэм түмүкпүттэн астынным.

Бу иннинэ үс олимпиадаҕа кыттыбытым быһыытынан, Дьокуускайга ыытыллыбыт олимипиада тэрээһинин биһирээтим, дьоно-сэргэтэ олус эйэҕэстэр, куруук үөрэ сылдьаллар.

Саха сирин бриллианын баран көрө сырыттыбыт. Күрэхтэһии кэнниттэн эксурсияҕа барыахтаахпыт. Мамонт түмэлин эбэтэр ирбэт тоҥу көрөр улахан баҕалаахпын, — диэн кылгастык кэпсиир.

Есения оскуола кэнниттэн П.Ф.Лесгафт аатынан физическэй култуура уонна успуорт институтугар туттарсар былааннаах. Физкултуураҕа учууталынан кини эбэтэ, тустаах биридимиэт учуутала, Североморскайдааҕы гимназия дириэктэрин солбуйааччы Ольга Борисовна Скорая буолар. “Мин бэрэстэбиитэл, оҕолору бэлэмнээбит киһи быһыытынан 2003 сылтан олимпиадаларга барытыгар сылдьабын. Есения дьарыктанар оҕолору биһирии көрөн, олус баҕаран, дуоһуйан туран дьарыктанар” – диэн этэр.

Физкултуураны, успуорду өрө тутар, биһириир ыал диэххэ сөп. Ольга Скорая физкультурнай институту бүтэрбит, спортивнай гимнастикаҕа успуорт маастара. Олоҕун аргыһа, Есения эһэтэ төһө даҕаны байыаннай буоллар, эмиэ спортивнай гимнастика көрүҥэр успуорт маастарыгар кандидат эбит. Онон успуорт диэн баран муннукка ытаабыт ыал.