«Өбүгэ ситимэ» Москваҕа тиийэн күннээтэ

Муус устар 28 күнүттэн ыам ыйын 2 күнүгэр диэри Москваҕа норуоттар икки ардыларынааҕы “Сокровище Севера – 2025” быыстапка уонна дьаарбаҥка буолан ааста.

Быйылгы быыстапка 20 сыллаах үбүлүөйүн бэлиэтээтэ. Суолталаах тэрээһиҥҥэ Арассыыйа 20 эрэгийиэнин бэрэстэбиитэллэрэ Хоту, Сибиир уонна Уһук Илин төрүт олохтоохторун баай култуурунай нэһилиэстибэтин билиһиннэрдилэр. Быыстапкаҕа 500-тэн тахса маастар кытынна, ыалдьыт уопсай ахсаана 7 тыһыынчаны куоһарда. Кыттааччылар истэригэр Саха сириттэн “Өбүгэ ситимэ” уопсастыбаннай түмсүү эмиэ кыттыыны ылла.

Айар түмсүү салайааччыта,  норуот маастара МайКуо Ноговицына маннык сырдатта:

— Москваҕа XX норуоттар икки ардыларынааҕы «Сокровище Севера» бэстибээлигэр «Полярный стиль» күрэскэ «Бастыҥ национальнай таҥас (кыһыҥҥы кэллиэксийэ)» номинацияҕа кыттыыны ыллыбыт. Кэрэхсэбиллээҕэ баар, 10 эрэгийиэни кэннибитигэр хаалларан, бочуоттаах 3-с миэстэҕэ тигистибит.  Түмсүүбүтүгэр иккис сылын аҕыс кыттааччы кыһыҥҥы таҥас тигиитинэн дьарыктанар. Кинилэр бэйэлэрин оҥоһуктарын көрдөрдүлэр.

Ол курдук, илиинэн тигиллибит кыһыҥҥы таҥас араас көрүҥэ, түүлээх истээх бууктаах сон, чопчуурдаах дьабака сэлээппэ, оҕуруонан тигиллибит уонна национальнай киэргэтиилээх үтүлүк уо.д.а. – бу барыта дьүүллүүр сүбэ биһирэбилин ылла. “Өбүгэ ситимэ” айар түмсүү иистэнньэҥнэрэ, аата да этэрин курдук, өбүгэбит баай үгэһин, култууратын көрдөрөн, быыстапкаҕа кыттыбыт дьон сөҕүүтүттэн-махтайыытыттан,  махталынан кынаттанан, өссө чаҕылхай да бырайыактары толкуйдуулларыгар тирэҕинэн буолла.

Маннык улахан быыстапкаларга хайаан да кыттар соругу туруорунан үлэлиибит. Бу биһиги үлэбит түмүгүн көрдөрөр.