Өбүгэлэргит тустарынан буларга көмөлөһүөхтэрэ

Яндекс сервиһигэр «Архыыптарынан көрдөөһүн» Саха сирин Национальнай архыыбын пуондатыттан докумуоннар баар буоллулар.

Докумуоннар улахан чаастара — чопчу көрдүүр дьоҥҥут олохторугар суолталаах бэлиэтээһиннэр, сүрэхтэниилэрэ уонна ыал буолбуттарын туһунан бааллар. Бу туһунан бэйэтин телеграм-ханаалыгар Ил Дархан Айсен Николаев иһитиннэрэр.

Кини этэринэн, сервискэ архыыптан бэриллибит 550 илиинэн толоруллубут кумааҕылар бааллар. Бу 3000 кэриҥэ дьыала, манна хас биирдиилэрэ метрическэй кинигэлээхтэр.

«Бу туһанааччылар Саха сиригэр өбүгэлэрин туһунан булалларыгар, онтон чинчийээччилэр — биһиги өрөспүүбүлүкэбитигэр араас кэмнэргэ олорбут дьон туһунан билэллэригэр көмөлөөх буолуо «, — диэн бэлиэтиир Айсен Николаев. 

Миэтирикэнэн үлэлииргэ нейросеть туһаныллар: урут илиинэн суруллубуттары ааҕаллар уонна бэчээттэммит тиэкискэ уларыталлар.

Яндекстан иһитиннэрбиттэринэн, «Архыыптарынан көрдөөһүнүнэн» туһанааччылар элбэхтэр. Холобур Москва куората, ону сэргэ Москва, Омскай уонна Оренбург уобаластара, Чувашия. Маныаха ый ахсын сервис баазата дойду араас эрэгийиэннэриттэн саҥа историческай докумуоннарынан хаҥатыллар.

«Архыыптарынан көрдөөһүн» — Яндекс сервиһэ 2023 сыл саҥатыгар саҕаламмыта. Манна Москва, Оренбург, Астрахань, Вологда, уо.д.а. уобаластартан, ону таһынан муниципальнай оройуоннартан 16 мөл. тахса историческай докумуоннар киирбиттэр.

Нейросеть бэлиэлэри билэр, холобур, алпаабыкка суох буукубалары, буочар уратытын учуоттуур уонна аҕыйах сөкүүндэ иһинэн уустуктук ааҕыллар суруктары бэчээттээн таһаарар.

СӨ Ил Дарханын уонна СӨ Бырабыыталыстыбатын пресс-сулууспата