«Эдэр армеецтар кулууптара» лааҕыр дойдуга бэриниилээх буоларга иитэр

Балаакканан лааҕыры Анна Сивцева уонна Оксана Готовцева «Вымпел-Шторм» Бүтүн Арассыыйатааҕы байыаннай-патриотическай лааҕыр бырагырааматынан тэрийэн ыыттылар.

Лааҕыр түөрт симиэнэнэн, барыта 160 оҕону хабан үлэлээтэ. Балаакка лааҕырга биир симиэнэҕэ 10-н 17-гэр диэри саастаах 40 оҕо сырытта. Бырагыраама быһыытынан оҕолорго олох оскуолата, спортивнай ориентирование, пулевой ытыы, автоматы хомуйуу уонна ыһыы, картография, норуот төрүт дьарыгар уһуйуу, суһал көмөнү оҥоруу, туой ускуустубата, флористика, «Биһиги кэммит дьоруойа» тэрээһиннэрэ ыытылыннылар. Ону таһынан, саха эстрадатын ырыаһыттара кыттыылаах култуурунай бырагыраамалар итиэннэ буоксаҕа өрөспүүбүлүкэ уонна Уһук Илин уокурук кыайыылаахтарын уонна призердарын кытары көрсүһүүлэр буоллулар.

Оҕолор бэрээдэктээх буоларга, кэккэлии хаамарга, бэйэ-бэйэҕэ көмөлөһөргө, дьону уонна үлэни ытыктыырга, Аҕа дойдуну уонна төрөөбүт дойдуну таптыырга үөрэннилэр.