Эдэр дьахтар баан каартатын уоран алта сылга диэри хаайыллыан сөп

Арыгы содулуттан күннэтэ кэриэтэ араас быһылааннар тахса тураллар. Бу күннэргэ биир эр киһи күүскэ «бырааһынньыктаан», итирэн хаалан, каартатыттан харчытын уордарбыта билиннэ.

Дьокуускай куорат полициятын 1 нүөмэрдээх отделын дьуһуурунай чааһыгар баан каартатын уордарбыт киһиттэн сайабылыанньа киирбит. Кимэ биллибэт дьон эр киһи каартатын уоран ыланнар, счетуттан    22 тыһ. солк. суйдаабыттар.

Суһал-ирдиир үлэ кэмигэр биллибитэ, уорууга 24 саастаах олохтоох дьахтар уорбаланара быһаарыллыбыт.

Ол курдук эмсэҕэлээччи түүҥҥү барга үчүгэйдик билсибэт кыыһын кытары Тутааччы күнүн бэлиэтээбит.  Ол кэмҥэ арыгы эбии атыылаһаары эр киһи баанын каартатын кыыска  төлөөтүн диэн биэрбит.  Ону дьахтар  эр киһи итирбитин туһанан, каартаны төттөрү биэрбэтэх.  Эмсэҕэлээччи  дьиэтигэр барбытын кэннэ, дьахтар атын барга барбыт уонна каартаҕа баар харчыны туттубут.

Билигин эдэр дьахтарга  РФ Холуобунай кодексын 158 ыстатыйатын 3 чааһынан холуобунай дьыала көбүтүллүбүт. Туһааннаах ыстатыйанан уорбаланааччы алта сылга диэри көҥүлэ быһыллыан сөп.