Эдэр дипломаттар Бүтүн Арассыыйатааҕы медиапуорумҥа ситиһиилээхтик кытыннылар

Дьокуускай куорат 5 №-дээх оскуолатын «Эрудит» интеллектуальнай кулуубун хамаандата (салайааччы Елена Никонова) өрөспүүбүлүкэ чиэһин чиэстээхтик көмүскээтэ. Ильмень күөлгэ саха буойуттарын хорсун быһыыларын туһунан кэпсээнинэн «Бастыҥ пост» анал аакка бастакы миэстэни, уонна Новгородтааҕы Кириэмил Софийскай соборугар анаммыт «Бастыҥ видеосюжет» анал аакка үһүс миэстэни ылла.

Бу туһунан СӨ Ил Дархана Айсен Николаев МАХ-ка тус ханаалыгар суруйда диэн эрэгийиэн бырабыыталыстыбатын пресс-сулууспата иһитиннэрэр.

Великий Новгородка эдэр дипломаттар II Бүтүн Арассыыйатааҕы медиапуорумнара буолан ааста, онно саха оскуолатын үөрэнээччилэрэ бэйэлэрин чиэстээхтик көмүскээтиллэр.

«Арассыыйа дипломаттарын ассоциацията» уопсастыбаннай тэрилтэ өйөбүлүнэн тэриллибит киэҥ далааһыннаах пуорум дойду араас эрэгийиэннэриттэн 150-тан тахса талааннаах оҕону түмтэ. Бүтүн Арассыыйатааҕы медиапуорумҥа ситиһиилэринэн Дьокуускайтан  оскуола үөрэнээччилэрин өрөспүүбүлүкэ СӨ Ил Дархана Айсен Николаев эҕэрдэлээтэ.

«Биһиги эдэр дипломаттарбытын, кинилэр педагогтарын уонна уһуйааччыларын эҕэрдэлиибин! Биһиги норуоппут хорсун быһыытын уонна эр санаатын туһунан кэпсээннэр эдэр көлүөнэни кынаттыыллар, Ийэ дойдуга киэн туттуу уонна таптал иэйиитин бөҕөргөтөллөр. Оҕолор иннилэригэр өссө да саҥа ситиһиилэр уонна кыайыылар күүтэллэр», — диэн Ил Дархан эттэ.

Эдэр дипломаттар II Бүтүн Арассыыйатааҕы медиапуорумнара үрдүкү кылаас үөрэнээччилэригэр – эдэр дипломаттар кулууптарын кыттааччыларыгар профессионаллартан уопуту ылынарга, ону таһынан бэйэлэрин билиилэрин, лидерскэй хаачыстыбаларын уонна аныгы геополитическай ыҥырыылары дириҥник өйдүүллэрин көрдөрөргө ураты түһүлгэнэн буолла.

Пуорум кыттыылаахтарынан «Кэлэр кэм дипломаттара» оҕо уопсастыбаннай хамсааһынын бэрэсидьиэнэ, АРД бэрэссэдээтэлин солбуйааччы, Ураты боломуочуйалаах уонна толору бырааптаах Посол Валерий Егошкин салайааччылаах Башкортостан Өрөспүүбүлүкэтиттэн, Калининградтан, Владивостоктан, Нальчиктан, Казаньтан, Москватан, Дьокуускайтан, Калужскай, Брянскай уонна Московскай уобаластартан эдэр дипломаттар буоллулар.