Салгыы
Эдэр гимнасткаларга умнуллубат түгэннэр

Эдэр гимнасткаларга умнуллубат түгэннэр

Ааптар:
25.03.2023, 21:43
Хаартыскаҕа Мария Васильева түһэриитэ
Бөлөххө киир:

«Муус устар — 2023» бэстибээл икки күн ньиргиччи буолан ааста. Успуорт түһүлгэтигэр оҕоҕо уонна ыччакка аналлаах чаҕылхай элбэх түһүлгэ тэрилиннэ. Арассыыйа билиҥҥи сүүмэрдэммит хамаандатын бастыҥ гимнастката, юниордарга аан дойду үс төгүллээх, улахан дьоҥҥо Европа чөмпүйүөнэ Лала Крамаренко уонна олимпийскай чөмпүйүөн, билигин Арассыыйа сүүмэрдэммит хамаандатын эрчийэр тириэньэр Ксения Дудкина кэлэн кыттыыны ыллылар.

Хаартыска: Мария Васильева (СИА)

Маҥнайгы күн «Модун» спорткомплекска «Бастакы хардыыттан успуорт үрдүкү ситиһиилэригэр» диэн  улахан кэнсиэр буолла. Иккис күн Дьокуускай к. 25 №-дээх оскуолатын гимнастикаҕа саалатыгар Европа уонна юниордарга аан дойду үс төгүллээх чөмпүйүөнэ Лала Крамаренко уонна олимпийскай чөмпүйүөн, билигин Арассыыйа сүүмэрдэммит хамаандатын эрчийэр тириэньэр Ксения Дудкина Саха сирин кулууптарын, успуорт оскуолаларын кырачаан гимнасткаларыгар  үөрэтэр маастар-кылаастары ыыттылар.
Дьокуускайтан «Либерти», «Бриллианты Туймаады», «Сардаана», «Сияние», «Кристалл» кулууптарыттан, Хаҥалас успуорт оскуолатыттан, Нерюнгри «Феникс»  кииниттэн барыта 150 оҕо билигин Арассыыйа биир саамай ааттаах-суоллаах спортсменкатын уонна сүрүн тириэньэрин эрчиллиитигэр сылдьан үөрдүлэр-көттүлэр, долгуйдулар.

Ксениялаах Лала элбэх оҕону хабаары  маастар-кылааһы иккитэ ыыттылар. Чөмпүйүөннэр биэрбит дьарыктарын оҕолор өргө диэри өйдүү-саныы сылдьыахтара.

«Либерти» кулуупка дьарыктанар Далаана Антонова: “Мин кэнсиэркэ кулуупка бииргэ эрчиллэр кыргыттарбын кытта «Крылатые качели» диэн нүөмэри көрдөрбүппүт. Оттон бүгүн маастар-кылааска Лала Крамаренко бэйэтигэр сылдьан дьарыктанан көрдүм. Кини мин холобур оҥостор, саамай сөбүлүүр гимнасткам. Олимпийскай чөмпүйүөн Ксения Дудкина мээчиги кытта дьарыгы көрдөрдө, оттон Лала Крамаренко ОФП уруогун ыытта. Мин бу түгэннэри куруук өйдүү-саныы сылдьыам», — диэн санаатын үллэһиннэ.
Уус-уран гимнастикаҕа сахалартан маҥнайгы аан дойдутааҕы успуорт маастара, «Азия оҕолоро» аан дойдутааҕы IV оонньуутун кыайыылааҕа, билигин Москва к. тириэньэрдиир Виолетта Иванова- Никифорова: «Дойдубар кэлбэтэҕим икки сыл буолбут. «Муус устар» бэстибээлгэ кыттыыны ылбыппыттан наһаа астынабын. Икки күн сүрдээх тэтимнээхтик ааһа оҕуста. Бэҕэһээ араас көрсүһүүлэр, улахан кэнсиэр, бүгүн маастар-кылаас буолан ааста. Манна көтөн иһэн кыргыттарга — Лалалаах Ксенияҕа Саха сирин туһунан элбэҕи кэпсээбитим. Бириэмэ ыгым буолан, улаханнык тугу да көрбөккө баран эрэллэр. Бэҕэһээ кэнсиэркэ дьон наһаа итиитик-истиҥник көрсүбүтүттэн долгуйдубут. Бу түгэннэри гимнастиканан дьарыктанар оҕолор өссө да өр саныахтара. Хас биирдии кыыс Лала Крамаренко, Ксения Дудкина курдук чөмпүйүөннэргэ хайдах эмит чугаһыан, алтыһыан баҕарар.  “Муус устар” бэстибээл кинилэргэ маннык кыаҕы бэлэхтээтэ. Маннык таһымнаах дьонтон дьарык, билии, сатабыл бэриһиннэрэр Арассыыйаҕа хайа баҕар гимнастка ыра санаата буолуо дии саныыбын. Онтон мин гимнастикаҕа барбыт суолум билигин дьарыктанар саха кыргыттарыгар ыра санаа хайа баҕар ситиһиигэ тиэрдиэн сөбүн көрдөрөр дии саныыбын», — диэн  эттэ.

 Уус-уран гимнастикаҕа олимпийскай чөмпүйүөн, Арассыыйа сүүмэрдэммит хамаандатын старшай тириэньэрэ Ксения Дудкина: «Cаха сирэ өрүү мин сүрэхпэр. Манна тириэньэринэн үлэлээбит кэмим миэхэ олохпор таба суолга үктэнэрбин олуктаабыта. Олох да тириэньэр идэтин туһунан санаабакка сырыттахпына, чугас дьүөгэм Виолетта Иванова угуйан, оҕолору кытта үлэлээн киирэн барбытым. Манна үөрэх ылан, олимпийскай резервэ училищетын бүтэрбитим, диплом ылан идэлэммитим. Уонна саамай долгутуулааҕа диэн манна, Саха сиригэр, тапталбын көрсүбүтүм. Кэргэним көҥүл тустууга Саха сирин хас да төгүллээх чөмпүйүөнэ Евгений Коломиец. Кинини кытта ыал буолан холбоспуппут, билигин икки оҕолоохпут, Москваҕа олоробут, үлэлиибит. Билигин Новогорскайга олимпийскай кииҥҥэ Арассыыйа сүүмэрдэммит хамаандатыгар старшай тириэньэринэн үлэлиибин. Онон Саха сирэ мин дьолбун тустээбитэ диэтэхпинэ омуннаабаппын. «Муус устар” бэстибээл оҕолорго наһаа улахан тирэҕи уонна инники сайдалларыгар уһулуччу кыаҕы, күүһү биэрэр эбит диэн сыаналаатым», — диэн эттэ.

Хаартыска: Мария Васильева (СИА)

Европа уонна юниордарга аан дойду үс төгүллээх чөмпүйүөнэ Лала Крамаренко: “Мин маннык бэстибээлгэ маҥнайгы сылдьыым. Ол гынан баран, маастар-кылаастары хаста да ыытан турабын. Оҕолору кытта үлэлиирбин, кинилэри кытта алтыһарбын, кинилэргэ кыахтарын арыйалларыгар көмөлөһөрбүн сөбүлүүбүн. Ол эрээри мин кэлэр өттүгэр булгуччу тириэньэр буолабын диир кыаҕым суох. Маастар-кылааска сылдьыбыт кыргыттары хайҕаатым, бары наһаа кыһаллан туран дьарыктаннылар, барытын болҕойон иһиттилэр, бэркэ үлэлээтилэр, дьарыктаннылар. Баҕалаах буоллахтарына, барыны сатыахтара, кыайыахтара дии саныыбын. Кэнсиэркэ уонна маастар-кылааска кыттыыны ылбыт уонна тэрийсибит дьоҥҥо барыларыгар махтанабын”, — диэн санаатын үллэһиннэ.

Уус-уран гимнастикаҕа  СӨ федерациятын бэрэсидьиэнэ Людмила Николаева: “Билигин оҕолор маннык дьиҥнээх сулустар холобурдарыгар үөрэнэн успуорка умсугуйуохтарыгар биһиги туохтааҕар да баҕарабыт. Аан дойду чөмпүйүөнэ Лала Крамаренкоҕа, олимпийскай чөмпүйүөҥҥэ, билиҥҥитэ тириэньэргэ Ксения Дудкинаҕа улаханнык махтанабыт. Кинилэр бэйэлэрин маастарыстыбаларын аҥаардас көрдөрүүнэн эрэ муҥурдамматылар, бэйэлэрин идэлэрин арыйан көрдөрдүлэр, дьарыктарыттан, эрчиллэр ньымаларыттан бэристилэр», — диэн эттэ.

Хаартыска: Мария Васильева (СИА)

Оҕо, ыччат ыра санаа оҥостор дьоруойдарын кытта биир түһүлгэҕэ алтыһар, кинилэртэн үөрэнэр, уһуйуллар кыаҕы бэлэхтээбитин иһин «Муус устар” дьоһун түһүлгэтигэр барҕа махтал буолуохтун!

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
29 марта
  • -11°C
  • Ощущается: -18°Влажность: 44% Скорость ветра: 7 м/с

Сообщить об опечатке

Текст, который будет отправлен нашим редакторам: