«Эдэр гвардия» испэктээк сүрэхтэннэ

Үүнэр көлүөнэ судаарыстыбаннай тыйаатыра Аҕа дойду сэриитигэр Улуу Кыайыы 79 сылынан  уонна Оҕо, ыччат тыйаатырын аан дойдутааҕы күнүн көрсө Александр Фадеев “Эдэр гвардия” арамаанынан испэктээги аан бастаан көрдөрдө.

Үгэс курдук, испэктээк иннинэ  тыйаатыр уус-уран салайааччыта  Алексей Павлов эҕэрдэ тылы эттэ уонна ханнык баҕарар бириэмэ, кэм-кэрдии бэйэтэ дьоруойдардааҕын бэлиэтээн эттэ. Аҕа дойду Улуу сэриитин  дьоруойдарынан “Эдэр гвардия” хомсомуол тэрилтэтин чилиэннэрэ Олег Кошевой, Любовь Шевцова, Сергей Тюленин, Ульяна Громова, Иван Земнухов, Сергей Левашов, Лидия Андросова, Владимир Осьмухин, Клавдия Ковалева уо.д.а. буолбуттара. Билигин Аҕа дойду сэриитин устуоруйатын барытын көлүөнэттэн көлүөнэҕэ тириэрдии улахан суолталаах.

Үүнэр көлүөнэ судаарыстыбаннай тыйаатырын сүрүн режиссера, СӨ ускуустубатын үтүөлээх диэйэтэлэ Александр Титигиров туруорбут  испэктээгин сүрүн санаата – төрөөбүт дойдуларын  туһугар олохторун да биэрэргэ бэлэм кыргыттар-уолаттар хорсун быһыыларын, тулуурдарын көрдөрүү.

Өссө биир кэрэхсэбиллээх түгэн —  “Эдэр гвардия” испэктээк Михаил Щепкин аатынан Москватааҕы тыйаатыр устуудьуйатын бүтэрэн кэлбит Айталыына Яковлеваҕа бастакы испэктээгэ. Эдэр артыыска Любовь Щевцованы оонньоото.

Испэктээк сценографиятын тыйаатыр худуоһунньуга, СӨ култууратын туйгуна Гоша Аммосов олус интэриэһинэйдик оҥорбут.

Испэктээги биир тыынынан көрөн олус долгуйбут көрөөччү, СӨ култууратын үтүөлээх үлэһитэ, СӨ социальнай көмүскэлин  үтүөлээх үлэһитэ Антонина Степанова санаатын маннык үллэһиннэ:

-Үүнэр көлүөнэ тыйаатырын сүрүн режиссера А.Титигиров туруорбут бу испэктээгин көрө олорон,  үйэ аҥаарын анараа өттүгэр нуучча тылыгар үөрэппит, аахпыт айымньыбыт дьоруойдара, уобарастара бу баардыы көһүннүлэр. Эдэр талааннаах артыыстар испэктээк ис хоһоонун толору арыйан, көрөөччүлэр ыраас харахтарын уута тохтоло суох түстэ. Айымньы хас биирдии дьоруойа бу баардыы, ол эбэтэр илэ бэйэлэрэ сылдьалларын курдук ылынным. Аны сыананы туох да түбүгэ суох чуолкайдык сыҕарытан, уларыта тутан иһэллэрэ көрөөччүлэри астыннарбыта буолуо дии саныыбын. Испэктээк  түмүгэр дьоруой ыччаттар олохтон хайдах сэймэктэнэн өлбүттэрин устуоруйаҕа киирбит архыып докумуонунан  көрдөрдүлэр. Саалаҕа эдэр ыччат толору кэлбитэ — патриоттуу иитии биир үтүө хайысхата. Онон тыйаатыр кэлэктиибигэр, талааннаах артыыстарга барҕа махталбын этэбин.

БЫҺААРЫЫ:

Испэктээккэ оонньоотулар – СӨ үтүөлээх артыыската Анна Флегонтова, СӨ култууратын туйгуннара Любовь Макарова, Владислав Портнягин, Кирилл Рожин, тыйаатыр эдэр артыыстара Сахайаана Сидорова, Елизавета Далбараева, Айыына Слепцова, Татьяна Хомподоева, Айталыына Яковлева, Никита Соловьев, Ньургун Черов, Спартак Ларионов, Мичил Хомподоев, Сергей Эверстов.