Эдэр харабыл аал өрөмүөннүүр тэрилтэ бункерыттан уматык уорбут

Саха сиринээҕи Тырааныспарга полицията дизельнэй уматык уоруллубут чахчытынан холуобунай дьыаланы силиэстийэлээһинин түмүктээтэ. 

ИДьМ сулууспатын Тырааныспарга Хотугулуу-Илиҥҥи линейнэй управлениетын дьуһуурунай чааһыгар аал өрөмүөннүүр собуотун дириэктэрэ, тэрилтэттэн биллибэт киһи дизельнэй уматыгы уорбутун туһунан тыллаабыт. Көрдүүр тэрээһиннэр кэмигэр холуобунай ирдэбил үлэһиттэрэ уорбаланааччыны туппуттар. Уорбаланааччы өрүс пароходствотын аал сырыытын учаастагар харабылынан үлэлиир 28 саастаах эр киһи буолара биллибит.

Силиэстийэ кэмигэр быһаарыллыбытынан, эр киһи үлэлиир сиригэр сылдьан, Индигиир өрүс кытылыгар кыһыҥҥы кэмҥэ турар аал уматыктаах бункеры бэлиэтии көрбүт. Дизельнэй уматык баарын быһаараан, массыынатынан уонна хачайдыыр тэрили туһанан, 600-чэ лиитэрэ дизельнэй уматыгы кистээн уорбут. Ону таһынан, сарсыныгар буруйданааччы  ким да көрбөтүнэн атын аал уматыктаах бункерыттан 750 лиитирэ уматыгы тимир буочукаларга хачайдаан ылбыт.