Эдэр исписэлиистэргэ аналлаах саҥа дьиэ үлэҕэ киирдэ

Эбээн Бытантай улууһун Кустуур сэлиэнньэтигэр “Мин Сахам сирэ XXI үйэҕэ” үтүө дьыала хамсааһын чэрчитинэн 4 кыбартыыралаах саҥа дьиэ үөрүүлээх аһыллыыта буолла.

Манна Арктикаҕа үлэлии кэлбит эдэр исписэлиистэр олоруохтара, диэн иһитиннэрэр Тутуу министиэристибэтин телеграм-ханаала.

Дьиэ сырдык, сылаас, толору хааччыллыылаах. Икки кыбартыыра орто оскуола учууталларыгар, биир – учаастактааҕы балыыһа исписэлииһигэр, төрдүс кыбартыыра – олохтоох дьаһалта үлэһитигэр бэриллиэхтээхтэр.

Олохтоохтор дохсун ытыстарын тыаһыгар доҕуһуоллатан, кыһыл лиэнтэни  дьиэни туппут “Федорова” ИП бэдэрээтчит бэрэстэбиитэлэ уонна олохтоох дьаһалта бэрэстэбиитэллэрэ кырыйдылар. Онон Кустуурга эдэр исписэлиистэр үлэни эрэ булбатылар, табыгастаах олорор дьиэлэннилэр.