Эдэр кыыс саҥа үлэҕэ киирэн баран ноутбугу уорбут

Дьокуускайга  интэриниэт-маҕаһыын пуунуттан ноутбугу уордулар. Бу туһунан Ис  дьыала министиэристибэтин Дьокуускайдааҕы  управлениетын пресс-сулууспата иһитиннэрдэ.

Ол курдук Дьокуускай полициятын 4-с нүөмэрдээх отделыгар 30 тыһ. солк. суумалаах ноутбугу уорбуттарын туһунан  интэриниэт-маҕаһыын бэрэстэбиитэлиттэн  сайабылыанньа киирбит.

Суһал-ирдиир үлэ  түмүгэр биллибитинэн,  ноутбугу 19 саастаах олохтоох кыыс уорбута быһаарыллыбыт.

Уорбаланааччы интэриниэт-маҕаһыын табаары биэрэр пуунугар менеджеринэн үлэлии киирбит. Саҥа менеджер  үлэтин үһүс күнүгэр оробуочай миэстэттэн   ноутбугу уоран барбыт. Итиэннэ уорбут малын  комиссионнай маҕаһыыҥҥа туттарбыт.

Билигин киниэхэ РФ Холуобунай Кодексын 158 ыст. 2 чааһынан холуобунай дьыала көбүтүлүннэ