Эдэр сааһы эргитэн

Уус Алдан улууһугар култуура бэтэрээннэрин сэбиэтэ уопсастыбаннай түмсүү (бэрэссэдээтэл А. Е.Федорова) тэрийиитинэн, араас кэмҥэ култуура үлэтигэр үлэлээбит бэтэрээннэри ыҥыран, «Арчы» дьиэтигэр бэртээхэй көрсүһүү тэрилиннэ.

«Арчы» дьиэтин үлэтин-хамнаһын билистибит, арчыланныбыт. Салгыы биир дойдулаахтарбыт, Опера уонна балет тыйаатырын көмүс куоластара З.Колодезникова, Д.Охлопкова, эстрада ырыаһыттара Кыталы Куо, В.Местников ырыаларын астына, киэн тутта иһиттибит. Баай астаах, үүттээх сылаас чэйдээх сандалы тула олорон истиҥ-иһирэх кэпсэтии буолла. Бу кэмҥэ тэрийээччилэр бииртэн биир араас оонньуулары оонньоттулар, бириистэри туттардылар.

Улууска култуура управлениетын начаалынньыгынан уһуннук, таһаарыылаахтык үлэлээбит ытыктыыр дьоммут И.П.Матвеев, экэнэмиис-буҕаалтыр Т.В.Уарова оччотооҕу кэми, үлэни-хамнаһы олус үчүгэйдик сырдаттылар. Сыырдаах сынньалаҥ киинигэр уһуннук, айымньылаахтык үлэлээбит, СӨ култууратын үтүөлээх үлэһитэ, Дьокуускайга балет оскуолатыгар үлэлиирин таһынан үгүс кинигэни суруйан күн сирин көрдөрбүт, аны саха бастакы балеринатын Ксения Посельская туһунан кинигэҕэ үлэлэһэ сылдьарын туһунан Екатерина Аммосова сүрдээх үчүгэйдик сырдатта. Тэрийээччилэр бииртэн биир араас оонньуулары оонньотон кэлбит бэтэрээннэри сэргэхситтилэр. Ырыаны, үҥкүүнү, оһуохайы көҕүлүттэн туттубут.

Бэтэрээннэр көрсүһүүлэрин тэрийбит, дьаһайан ыыппыт Анна Егоровна Федороваҕа, киниэхэ күүс-көмө буолбут дьоммутугар уонна «Арчы» дьиэтин салалтатыгар дириҥ махталбытын тиэрдэбит.

Анастасия Осипова, Фаина Ширяева.

Анна Федорова хаартыскаларга түһэриитэ.