Эдэр тутааччылар пуорумнара саҕаланна

Бүгүн, алтынньы 6 күнүгэр, «Молодой специалист — строитель будущего» диэн федеральнай таһымнаах пуорум пресс-конференцията буолла.

Конференцияҕа СӨ тутуу миниистирэ Виктор Романов, ХИФУ ректора Анатолий Николаев, РФ тутуу министиэристибэтин уонна ОДьКХ  кэмпитиэнсийэтин үөрэтэр киинин салайааччыта Ирина Минина, СӨ үөрэҕин уонна наукатын миниистирин солбуйааччы Михаил Присяжнай, СӨ нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Светлана Горюшинская  кыттыыны ыллылар.

ХИФУ ректора Анатолий Николаев:

— Биһиги университеппытыгар тутуу кыһатыгар үлэлиир исписэлиистэри бэлэмниибит. Ол иһигэр саҥа тутуллар дьиэ хайдах тутуллуохтааҕын, иһин-таһын, архитектуратын , ким тутуохтааҕын, дьиэ коммуникациятыгар тиийэ билэр  исписэлиистэри бэлэмнииргэ дьулуһабыт. Бары билэрбит курдук, ирбэт тоҥҥо тутуллубут дьиэлэри дьэндэтиигэ киэҥ билии-көрүү ирдэнэр. Дойдубут бэрэсидьиэнэ Владимир Путин Дьокуускай уонна Нерюнгри куораттар маастар-былааннарын бигэргэппитэ. Ол иһин чугас кэминэн элбэх эбийиэк тутуллуоҕа. Бу эбийиэктэргэ үлэлиир исписэлиистэри бэлэмниэхтээхпит.

СӨ Тутуу миниистирэ Виктор Романов:

-Биһиги сүрүн сорукпут олохтоох каадыры үлэҕэ ылыы буолар. Сыл ахсын тас дойдуттан кэлэр оробуочай күүс  үлэһиккэ наадыйыы сыыппаратын саппат. Биһиги Ил Дархаммыт Айсен Сергеевич Николаев сорудаҕынан былырыын тутуу эйгэтигэр олохтоох каадырынан хааччыйыы диэн бырагырааманы саҕалаабыппыт. Бу бырагыраама чэрчитинэн, олохтоох дьону тутуу эйгэтигэр үлэлэтии туһунан соругу тутуһабыт. Кыһалҕалар бааллар, ол курдук саас, сайын, күһүн үлэһит илии тиийэр эбит буоллаҕына, кыһын уустуктардаах буолар. 

Бэлиэтээн суруйдахха, федеральнай таһымнаах  пуорум алтынньы 7-8 күннэригэр «Сэргэлээх уоттара» култуура киинигэр ыытыллыаҕа. Манна устудьуоннар, эдэр тутааччылар тутуу эйгэтигэр үлэлиир, бэйэлэрин суолларын бу эйгэҕэ тобулбут дьону кытта атах тэпсэн олорон кэпсэтиэхтэрэ, үлэ дьаарбаҥкатыгар кыттыахтара.