Эдэр учуонай полимернай композиты оҥоруу технологиятын айбыт

Ил Дархан гранын куонкуруһун биир кыайыылааҕа, ХИФУ айылҕа үөрэҕин билимин институтун “С.А.Слепцова аатынан полимернай нанокомпозит технологиятын” үөрэтэр-технологическай лабаратыарыйа билим үрдүкү үлэһитэ Андрей Васильев 3D-бэчээт ньыматынан полиэфирэфиркетоҥҥа олоҕуран полимернай композиты оҥоруу технологиятын айбыт.

Полиэфирэфиркетоны композит састаабыгар эптэххэ кыраадыһын үрдэтэр, матырыйаал уһуннук эргэрбэт буолар.

Андрей Васильев бэлиэтииринэн, чинчийии түмүгэ университекка улахан көдьүүстээх полимертан оҥоһуктары уонна матырыйаалы оҥоруу технологиятын сайыннарарга, ол оҥоһуктары экэниэмикэ араас салааларыгар тарҕатыыга көмөлөһүөҕэ.

Санатан эттэххэ, былырыын дойду сайдыытыгар туһаайыллыбыт билим-технология хайысхатыгар инники күөҥҥэ сылдьар бырайыактары олоххо киллэриигэ  Ил Дархан Айсен Николаев барыта 5 мөл. солк. суумалаах уон грана көрүллүбүтэ.

2024 сыл түмүгүнэн бэриллибит гранынан эдэр учуонайдар уонна исписэлиистэр 5 диссертацияны бэлэмнээбиттэр, 8 өй үлэтин түмүгүн бэлиэтэппиттэр, салааларынан Арассыыйатааҕы таһаарыыларга 14 ыстатыйаны, Web of Science / Scopus баазаҕа бэлиэтэнэр билим таһаарыыларыгар 10 ыстатыйаны бэчээттэппиттэр.

Ил Дархан уонна Бырабыыталыстыба пресс-сулууспата.