Эдэр уол баантан бөдөҥ суума харчыны уоран тутулунна

ИДьМ сулууспатын Сунтаар улууһун отделын холуобунай ирдэбил үлэһиттэрэ 24 саастаах олохтоох киһи баантан харчыны уорбутугар кыттыгастааҕын быһаардылар.

Силиэстийэ быһаарыытынан, уорбаланааччы баан счетугар баара-суоҕа 2 000 солкуобайдаах сылдьан, букмекерскай саайтка ставка оҥорорго быһаарыммыт. Кини  харчытын букмекерскай хонтуораҕа көһөрбүт уонна харчыта балаансатыттан көҕүрээбэтэҕин, ол гынан баран төлөбүр ааспытын бэлиэтии көрбүт. Оччотугар кини мобильнай сыһыарыыга алҕас тахсыбытын өйдөөбүт уонна 90-тан тахса транзакцияны оҥорбут. Ол түмүгэр буруйу оҥорооччу баантан 234 000 солкуобайтан тахса харчыны уорбут.

РФ Холуобунай кодексатын 158-с ыстатыйатын 3-с чааһынан («Уоруу») холуобунай дьыала көбүтүлүннэ. Буруйдаах 6 сылга диэри көҥүлэ быһыллыан сөп, диэн ИДьМ пресс-сулууспата иһитиннэрэр.