Эдэр урбаанньыттар оҥоһуктара атыыга хамаҕатык барда

Кэлиҥҥи сылларга өрөспүүбүлүкэ оскуолаларыгар урбаан кииннэрэ тэриллэн, оскуола оҕолоро сувенир оҥоруутуттан саҕалаан, түргэнник ситэр салааны сайыннарыыга тиийэ ылыстылар.

Бу күннэргэ күрэс төрүт көрүҥнэрин Манчаары оонньууларын кэмигэр Авксентий Мординов аатынан лиссиэй үөрэнээччилэрин сувенирдара атыыга хамаҕатык бардылар.
Оскуола эдэр урбаанньыттарын үлэтин туһунан лиссиэй дириэктэрэ Изабелла Сивцева  маннык кэпсээтэ:
— 2021 сыллаахха оскуолабытыгар биисинэс- инкубатор тэринэн, оҕолору атыы-эргиэн эйгэтигэр киллэрэргэ өрөспүүбүлүкэҕэ былааннаммыт үлэҕэ кыттыспыппыт. А.Е. Мординов аатынан лиссиэй оҕолоро технология уруогар, үөрэх таһынан чааска илиинэн оҥоһукка ылсыбыттара. Биисинэс- инкубатор салайааччыларынан технология учууталлара Анисия Кириллина уонна Анфиса Слепцова анаммыттара. Оскуолаҕа, улууска, өрөспүүбүлүкэҕэ буолар быыстапкаларга, анал бырайыактары көмүскүүр, уопут атастаһар тэрээһиннэргэ көтүппэккэ кыттан барбыппыт. Быйыл оҕолор Үлэ кыбаартала креативнай кластер тэрээһинигэр улахан дьону кытта тэҥҥэ кыттан, харахтара уоттанан кэлбитэ. Быйылгыттан «финансовая грамотность» диэн эбии үөрэҕи бары кылаастарга үөрэтэбит. Олох ирдэбилинэн оҕо оскуолаттан тахсарыгар күүстээх күрэстэһиини тулуйар, дьүккүөрдээх, сатабыллаах буолуохтаах. Оччоҕо олоҕор кыайыылаах, таһаарыылаах буолуо.
Манчаары оонньууларыгар эрдэттэн бэлэмнэммиппит. Сувенирнай бородууксуйаны оҥорууга ылсар инниттэн, анал тэриллэри атыыласпыппыт. Бырайыагы Альберт Посельскай уонна  Андрей Ефимов  салайаллар. Манчаары оонньууларын кэмигэр дьэ тиритии-хорутуу буолла — атыылаһааччы сакааһын түүннэри оҥоруу, сарсыардаттан киэһээҥҥэ диэри атыылааһын, угуйукка үлэлэһии…

7, 9, 11 кылаас оҕолоро олох толлубакка ылсан испиттэрэ үөрдэр. Атыы-эргиэн табылынна — 800-тэн тахса оҥоһук атыыга хамаҕатык барда. Сыана удамыр буолан, сувенирдары хото атыыластылар. Онон урбаанньыт оҕолор үлэлэрин түмүгүттэн санаалара көнньүөрэн, күһүҥҥүттэн өссө араас хайысхаҕа үлэлииргэ сананнылар.