Эдэр ыалларга дьиэ кэргэн холумтанын бэлиэтэ буолар уоту-күөһү туттардылар

Дьиэ кэргэн, таптал уонна бэриниилээх буолуу күнүгэр эдэр ыалларга дьиэ кэргэн холумтанын бэлиэтэ буолар уоту-күөһү үөрүүлээх быһыыга-майгыга туттардылар.

Быйыл тохсунньуга «Арассыыйа» быыстапка-пуорумҥа  «Арассыыйа сүрэҕэ» Бүтүн Арассыыйатааҕы дьиэ кэргэн холумтанын уота-күөһэ уматыллыбыта. Бу холумтан уотун Саха сиригэр Владислав уонна Жанна Федоровтар аҕалбыттара. Кинилэр ааспыт сыл сэтинньигэ «Арассыыйа» быыстапка-пуорумҥа баран, сахалыы уруу сиэрин-туомун көрдөрөргө талыллыбыттара. «Арассыыйа сүрэҕэ» диэн дьиэн кэргэн холумтанын уотун уматыыга кыттыбыттара.

Бүгүн, Дьиэ кэргэн, таптал, бэриниилээх буолуу күнүгэр Дьокуускайга ЗАГСа дьиэтигэр элбэх сыл бииргэ олорбут ытык-мааны кэргэнниилэр, олохторун саҥа холбообут эдэр ыаллар муһуннулар.

Эдэрдэргэ дьиэ кэргэн холумтанын уота туттарылынна, саастарын тухары бииргэ иллээхтик олорбут ытык-мааны кырдьаҕастартан, ЗАГС үлэһиттэриттэн истиҥ-иһирэх тыллары иһиттилэр.

Маны сэргэ, үөрүүлээх күн 60 сыл  бииргэ олорбут ыалы Тамара Ильинична уонна Георгий Николаевич Степановтары  чиэстээтилэр.

Ил Дархан Айсен Николаев киһи олоҕор саамай күндүтэ дьиэ кэргэнэ, дьиэ кэргэн төрдө — таптал уонна бэриниилээх буолуу буоларын бэлиэтээтэ. Бу истиҥ иэйиини олохторун тухары харыстыылларыгар баҕарда.

СӨ Ил Дарханын уонна Бырабыыталыстыбатын пресс-сулууспата