«Эдьигээн» суолунан айанныахха сөп буолла

Саха сирин икки оройуонугар «Эдьигээн» кыһыҥҥы суолунан айан-сырыы баар буолла.

Бу иннинэ суолу күн-дьыл уларыйыытыттан, мөлтөөһүнүттэн быстах кэмҥэ саппыттара. Ол туһунан эрэгийиэннээҕи суол-иис управлениета иһитиннэрэр.

Оттон билигин суолу оҥорооччулар Бүлүү уонна Эдьигээн улуустарыгар «Эдьигээн» кыһыҥҥы суолу оҥордулар диэн иһитиннэрэллэр. Бу учаастагынан  30 тн. диэри ыйааһыннаах көлөлөр сылдьаллара көҥүллэммит.

Санатар буоллахха, Бүлүү — Эдьигээн кыһыҥҥы айан суола уонна Бүлүү эбэнэн туоруур суол кулун тутар 20 күнүттэн быстах кэмҥэ сабыллыбыта.