Эдьигээҥҥэ биир күн икки тыатааҕы бөһүөлэккэ киирбит

Эдьигээн бөһүөлэгэр тыатааҕы киирэн аймалҕан тахсыбыт сураҕа чахчытын, сымыйатын билээри чопчулуурга сананныбыт.

Ол курдук бу сурах чахчытын ааһан, биир күҥҥэ бөһүөлэккэ икки тыатааҕы киирэн кутталы үөскэппитин туһунан улуус  судаарыстыбаннай иниспиэксийэтин экологияҕа нодзуорун салайааччыта Виктор Ли Фу кэпсээтэ:

—Бөһүөлэккэ тыатааҕы чахчы киирбитэ. Биһиги Булт департаменыгар рапорт суруйбуппут. Онон, лиссиэнсийэ бэриллэн тыатааҕы бултанна. Булчут аата  Михаил Иннокентьевич Ильинов диэн. Мин эһигини булчуту кытта кэпсэтиннэриэм, — диэтэ уонна быһа сибээскэ холбоото.

Булчут Михаил Ильинов:

— Бэҕэһээ, бэс ыйын 16 күнүгэр, Эдьигээн бөһүөлэгэр тыатааҕы кулууппут таһынан сүүрэн ааспытын дьон көрөн аймаммыта. Бу ааспыт сааскыттан быһа буулуур 3-4  саастаах тыатааҕы буолар. Ыттарбытынан үрдэрэн, эккирэтэн бөһүөлэк таһынан, киһи уҥуохтарын туһаайыларыгар ситэн бултаабыппыт. Бултаныллыбыт кыылбытын дьаһайа сырыттахпытына, аны аҕам тиэргэнигэр иккис тыатааҕы киирбитин туһунан суһал иһитиннэрии кэлбитэ. Инньэ гынан биир күҥҥэ икки тыатааҕыны бултаатыбыт. Кэлин тыатааҕы олус элбээтэ, дьоҥҥо-сэргэҕэ кутталланна. Ити бултаныллыбат буолан дии саныыбын. Лиссиэнсийэ да сыаната, ыстарааба да улахана бэрт.