Эдьигээҥҥэ Дьокуускайтан хочуолунай саппаас чаастарын илдьэ сөмөлүөт көтүөҕэ

Дьокуускайтан Эдьигээҥҥэ АН-26 сөмөлүөт хочуолунай үлэтин сөргүтэргэ саппаас чаастары илдьэ көтүөҕэ. Бу туһунан СӨ бырабыыталыстыбатын бэрэссэдээтэлин бастакы солбуйааччы Дмитрий Садовников иһитиннэрдэ.

Билиҥҥитэ миэстэтигэр икки хочуолунай илиинэн оттуллан үлэлии турар, ол эрээри тустаах температуранан хааччыйбаттар — 80 буолуохтааҕын 57 уонна 58 буолуохтааҕын 38 кыраадыстары тутан тураллар. Бу тымныы усулуобуйатыгар ититии систиэмэтин үлэтин харгыстыан сөп.

Эдьигээҥҥэ Ньурбаттан исписэлиистэр көмөлөһө бардылар. Оттон эбии оборудование 21 ч. диэки тиийэрэ күүтүллэр. Саппаас чаастар тиийдилэр даҕаны таҥыы үлэтэ саҕаланыаҕа, тохсунньу 6 күнүн сарсыардатыгар сэттэ хочуол бары үлэлииллэрэ былааннанар.